स्याङ्जा २४ चैत । सर्वोदय शान्ति पदयात्रामा निस्केका नेपाल केसरी रास्ट्रसन्त डा. मणिभद्र मुनिजी महाराजलाई आइतवार पुतलीबजार नगरपालिकामा अभिनन्दन गरिएको छ ।
सेतो कपडा लगाउने, मुखमा पनि सेतै पट्टीले छोप्ने, हातमा कुचो जस्ता पन्छाउन तथा हम्काउन मिल्ने साधन, आफना लागि आवश्यक खाना पानीको बन्दोबस्तीको झोला बोकेर पैदल यात्रा मात्र गर्ने साधुसन्त महाराजलाई भब्य स्वागत, सम्मान सहित अभिनन्दन गरिएको हो ।
भारतको दिल्लीदेखि नेपालको मुक्तिनाथसम्म पदयात्राका क्रममा स्याङ्जा सदरमुकाम सहितको पुतलीबजारमा आइपुग्दा उनलाई पुतलीबजार नगरप्रमुख तुलसीराम रेग्मीले अभिनन्दन गर्नुभएको थियो ।
अभिनन्दन गर्दै प्रमुख रेग्मीले महाराजजस्तो ब्यक्तित्वलाई अभिनन्दन गर्न पाउनु शौभाग्य भएको बताउनुभयो । सादा जीवन, उच्च बिचार सहितको शान्ति पदयात्राको समेत शुभकामना दिनुभयो ।
स्याङ्जाको फेदिखोला गाउँपालिका ४ आरुखर्कमा विस २०२३ सालमा जन्मनु भएको हो । राष्ट्रिय तथा अन्र्तराष्ट्रियरुपमा सादा जीवन उच्च बिचार सहित धर्मभन्दा माथि उठेर सामाजिक सेवामा क्रियाशिल भएका कारण मणिभद्र महाराज मुनिजीको उपाधी पाउनु भएको छ ।
उहाले सबैधर्म (हिन्दु, बौद्ध, इस्लाम, इसाई) को एउटै उदेश्य शान्ति रहेको बताउनुभयो । शान्तिको सन्देश प्रवाह गर्न आफनो यात्रा जारी रहेको उहाले बताउनुभयो । शान्तिमा सबैथोक भएको जनाउदै आफु खुशी हुन अरुलाई पनि खुशी दिन सक्नु पर्ने र खुशीको लेनदेन भएमात्र शान्ति प्राप्ती हुने उहाको भनाई छ ।
महाराजसंगै अन्य ६ जनाको सन्तसाधुहरु पनि पैदलयात्रामा सहभागी हुनुहुन्छ । यसपटकको दिल्ली—मुक्तिनाथ याात्र बाहेक ९० हजार किलोमीटर पैदलयात्रा गरिसकेका यात्रा संयोजक पूर्वसांसद शंकरप्रसाद पाण्डेले जानकारी दिनुभयो ।
स्याङ्जामा जन्मेर अन्तर्राष्ट्रिय जगतमा स्याङ्जाको पहिचान बनाउन सफल भएको जनाउदै भब्य स्वागत एवं सम्मान गरिएको हो ।
अभिनन्दन कार्यक्रममा पूर्व सांसद शंकरप्रसाद पाण्डे, उपप्रमुख देवी अर्याल, मानवमिलन संस्था स्याङ्जाका अध्यक्ष नारायणप्रसाद पौडेल लगायतले महाराज स्याङ्जाको मात्र नभई नेपालकै गौरब भएकोमा जोड दिनुभयो ।
कार्यक्रमको सहजीकरण पुतलीबजार शिक्षा शाखा प्रमुख बाबुराम बरालले गर्नुभएको थियो । अभिनन्दन कार्यक्रममा बिभिन्न धार्मिक संघसंस्था, नागरिक समाज, शिक्षक, कर्मचारी, सुरक्षाकर्मी लगायतको सहभागिता थियो ।
