स्याङ्जा २५ जेठ । स्याङ्जाका किसान धानको बीउ बिक्रीबाट ९० लाख बढी आम्दानी गरेका छन् । नेपाल सरकारबाट सिफारिस भएका विभिन्न उन्नत जातका धानको बीउ बिक्रीबाट यहाँका किसान राम्रो आम्दानी गर्न सफल भएका हुन् ।
नेपाल सरकारले बनाएको विद्युतीय बीउ व्यवस्थापन प्रणाली (डेसिस) मार्फत स्याङ्जाका किसानले उत्पादन गरेको बीउ स्याङ्जा तथा बाहिरी जिल्लामा बिक्री गरिएको हो । वालिङ नगरपालिका–१ यवादीमा रहेको कृषि विकास स्रोत केन्द्रका प्रमुख सुदीप रेग्मीका अनुसार डेसिस प्रणाली मार्फत ११५ टन उन्नत जातका धानको बीउ बिक्री भएको हो । गण्डकी प्रदेशका ११ वटै जिल्ला कार्यक्षेत्र रहेको यस कार्यालयले पछिल्लो समय खाद्यान्न तथा तरकारी बालीका विभिन्न मुल बीउको परीक्षण तथा उत्पादन गर्दै आएको उहाँले भन्नुभयो ।
कार्यालयले उत्पादन गरेका मुल बीउ किसानलाई उपलब्ध गराउने र किसानले उत्पादन गरेका उन्नत बीउको बिक्रीका लागि समन्वय गर्दै आइरहेको पनि उहाले जानकारी दिनुभयो । स्याङ्जामा बीउ उत्पादनका लागि सूचिकृत भएका २२ समूह, सहकारी तथा फर्म रहेका छन् । सूचिकृत समूह तथा सहकारीले धान, गहुँ, मकै, आलु लगायतका उन्नत बीउ उत्पादन गर्दै आएका छन् ।
यस वर्ष जिल्लामा सूचिकृत भएकामध्ये १५ समूह सहकारीले रामधान, सावित्री, सावा मन्सुली, हर्दिनाथ जस्ता उन्नत जातका ११५ टन बढी धानको बीउ बिक्री गरेका उहाँले बताउनुभयो । स्याङ्जाबाट स्याङ्जाका स्थानीय पालिका सहित तनहुँ, कास्की र नवलपुरका स्थानीय तहमा डेसिस प्रणालीमार्फत बिक्री गरिएको हो । स्याङ्जाबाट बिक्री भएको धानको बीउमध्ये ८० प्रतिशत रामधान, १५ प्रतिशत सावित्री र पाँच प्रतिशत सावा मन्सुली रहेको उहाँले बताउनुभयो ।
किसानले डेसिस प्रणाली मार्फत बीउ बिक्री गर्दा प्रति किलोको छुट्टाछुट्टै मुल्य निर्धारण गरिएको छ । सोही प्रणालीमार्फत बिक्री गरेका आधारमा प्रोत्साहन रकम उपलब्ध गराउँदै आएको उहाँले बताउनुभयो । रामधान प्रति किलो ६८ रुपैंया, सावित्री प्रतिकिलो ६२, खुमल प्रजाति तथा बासमतिको प्रतिकिलो ९८ निर्धारण गरिएको छ ।
धान बिक्री पश्चात किसानलाई रामधानमा प्रतिकिलो २२, सावित्रीमा प्रतिकिलो १७ र खुमल तथा बासमतिमा प्रतिकिलो २८ प्रोत्साहनस्वरुप उपलब्ध गराइने उहाँले बताउनुभयो ।