स्याङ्जा २९ असोज । गल्याङ नगरपालिका १ र पाल्पाको रम्भा गाउँपालिका १ को संगमस्थल उत्तरबाहिनी क्षेत्रमा सञ्चालन भैरहेको उत्तर गण्डकी महामेला एवं दामोदर धर्मोत्सवमा भक्तजनहरुको घुइचो बढ्दै गएको छ ।
उत्तरवाहिनी क्षेत्रको पवित्र भूमिमा, शालग्रामको दिव्य दर्शनसँगै पुण्य कमाउने सुनौलो अवसर भन्दै भक्तजनहरु प्रत्येक दिन थपिदै गएको देखिएको छ । पवित्र उत्तरवाहिनी क्षेत्रमा धर्म, संस्कृति र प्रकृतिको महासंगमको रुपमा रहेकाले यसको प्रबर्दन गरी धार्मिक पर्यटनको विकास समेत गराउने आयोजक कालीगण्डकी ज्ञानविज्ञान प्रतिष्ठानले जनाएको छ ।
भगवान विष्णुका स्वरूप शालग्राम शिला पाइने पुण्यदातृ उत्तरवाहिनी कृष्णा गण्डकीको पवित्र भूमिमा महामेला तथा दामोदर महोत्सव सञ्चालन गरी यसको महिमालाई विश्वमाझ चिनाउन र सनातन धर्म–संस्कृतिको संरक्षण गर्न खोजिएको कालीगण्डकी ज्ञानविज्ञान प्रतिष्ठानका अध्यक्ष चैतन्य कृष्णले जानकारी दिनुभयो ।
उहाँले एक विराट अनुष्ठान सहित ऐतिहासिक, धार्मिक तथा सांस्कृतिक महामेला भैरहेकाले महामेलामा सहभागी हुन धर्मअनुरागीहरुलाई अनुरोध गर्नुभयो । उत्तर गण्डकी महामेला एवं दामोदर धर्मोत्सव २०८२ मा विश्वकै दुर्लभ शालग्राम शिलाहरूको दर्शन सहित चारवेद अठार पुराण ज्ञान महायज्ञ पनि सञ्चालन भैरहेको छ । जहाँ, प्रख्यात सन्त एवं विद्वान् कथावाचकहरुले दैनिक संगीतमय प्रवचन गरेका छन ।
यस्तै महामेलामा गण्डकी स्नानको महत्व र महिमाबारे विशेष प्रवचन, हरेक दिन बिहान–बेलुका भव्य गण्डकी आरती, धार्मिक झाँकी तथा सांस्कृतिक ¥याली, विद्यालय स्तरीय विभिन्न प्रतियोगिता, योग ध्यान तथा साधना विशेष शिबिर एवम् बालसंस्कार प्रशिक्षण समेत भैरहेको छ । महामेलामा राष्ट्रिय स्तरका चर्चित भजन गायकहरुको दैनिक भजन किर्तन प्रस्तुति रहेको छ ।
कालीगण्डकी ज्ञानविज्ञान प्रतिष्ठान गल्याङ नगरपालिका १, स्याङ्जा र रम्भा गाउँपालिका १ पाल्पा संगमस्थल, उत्तरवाहिनीको आयोजनामा भैरहेको महायज्ञ कार्तिक १९ गतेसम्म सञ्चालन हुनेछ ।