स्याङ्जा ५ असार । पुतलीबजार नगरपालिकामा दलित तथा सिमान्तकृत वर्गको अधिकार सम्बन्धी १ दिने प्रशिक्षण कार्यक्रम गरिएको छ ।
सो कार्यक्रमको उद्घाटन गर्दै पुतलीबजार नगरप्रमुख तुलसीराम रेग्मीले दलित तथा सिमान्तकृत वर्गको अधिकार सुनिश्चित गर्नका लागी राज्यले नै थुप्रै प्रयासहरु गर्दै आएको र ती राज्यले व्यवस्था गरेका अधिकारहरुलाई तोकिएको समुदाय र वर्गमा पुर्याउने जिम्मेवारी र दायित्व हामी सबैको रहेको बताउनुभयो । उहाँले दलित तथा सिमान्तकृत वर्गको अधिकार सुनिश्चित गर्ने कुरामा नगर सदैब सकारात्मक र प्रतिबद्ध रहेको र त्यसका लागी सुसुचित गर्ने जिम्मेवारी हामी सबैको रहेको बताउनुभयो ।
कार्यक्रममा प्रमुख प्रशासकिय अधिकृत धर्म राज ढुङ्गाना, कार्यपालिका सदस्य सञ्जिता अर्याल लगायतले शुभकामना मन्तब्य ब्यक्त गर्नुभएको थियो ।
कार्यक्रममा प्रशिक्षक द्धय दलितअधिकारकर्मी लिलबहादुर रनपाल र पत्रकार रमेश गोदारले दलित सम्बन्धी कानून र हक अधिकारका बारेमा प्रशिक्षण दिनुभएको थियो ।
नगर उपप्रमुख देवी अर्यालको अध्यक्षतामा सम्पन्न कार्यक्रममा कार्यपालिका सदस्य अनिता रुचालले स्वागत एवम् महिला तथा बालबालिका जेष्ठ नागरिक शाखा प्रमुख ठगिकुमारी खनालले संचालन गर्नुभएको थियो ।
कार्यक्रममा पुतलीबजार नगरपालिकाका दलित महिला जनप्रतिनिधि सहित १४ वटै वडाका दलित महिलागरि करिब ६० जनाको सहभागिता थियो ।
