स्याङ्जा, २ मंसिर । स्याङ्जामा गएको आर्थिक वर्ष २०८१÷०८२ मा विभिन्न जातका खाद्यान्न बालीका ६ लाख किलोग्राम भन्दा बढि बीउ उत्पादन भएको छ । जिल्लामा क्रियाशिल कृषि सहकारी, समूह र फार्मबाट धान, मकै, गहुँ, आलु सहित खाद्यान्नका ६ लाख ५३ हजार ८७३ किलोग्राम बीउ उत्पादन भएको हो ।
उत्पादन भएका खाद्यान्नका बीउमध्ये सबै भन्दा बढि आलुको ४ लाख ५० हजार ९ सय र धानको एक लाख १७ हजार ४३ किलोग्राम बीउ उत्पादन भएको छ । मकैको ७७ हजार ५ सय, गहुँको ७ हजार ४३० किलोग्राम र पशुलाई प्रयोग गरिने एक हजार किलो जैघाँस सहित ६ लाख ५३ हजार ८७३ किलोग्राम बीउ उत्पादन भएको कृषि ज्ञान केन्द्र स्याङ्जाले जानकारी दिएको छ ।
जिल्लाका ११ पालिकामध्ये बीउ उत्पादनको क्षमताले गल्याङ् नगरपालिकाका कृषक समूह अन्य पालिकाको तुलनामा अब्बल देखिएका छन् । गल्याङ्मा आलु तीन लाख ९५ हजार, धान ५२ हजार, मकै २० हजार र गहुँ तीन हजार गरी चार लाख ७० हजार किलोग्राम बीउ उत्पादन भएको हो ।
यस अवधिमा फेदीखोला गाउँपालिकामा ४७ हजार र चापाकोट नगरपालिकामा ४२ हजार ८३० किलोग्राम आलु, धान, मकै र गहुँको बीउ उत्पादन भएको केन्द्रले जनाएको छ । त्यसैगरी बिरुवा गाउँपालिकामा ३६ हजार दुई सय, भीरकोट नगरपालिकामा २३ हजार ५५० किलोग्राम बीउ उत्पादन भएको केन्द्रका कृषि विकास अधिकृत विकास वि.क.ले जानकारी दिनुभयो ।
उता पुतलीबजार नगरपालिकामा १९ हजार २९३, आँधीखोला गाउँपालिकामा ७ हजार खाद्यान्न र एक हजार किलो जैघाँस उत्पादन भएको थियो भने वालिङ नगरपालिका र कालीगण्डकी गाउँपालिकामा तीन÷तीन हजार किलोग्राम बीउ उत्पादन गर्न कृषकहरु सफल भएका थिए । अर्जुनचौपारी गाउँपालिकामा दुई हजार किलोग्राम बीउ उत्पादन हुँदा हरिनाश गाउँपालिकामा आलु, धान, मकै र गहुँको बीउ उत्पादन गर्न सकेन् ।
जिल्लामा उत्पादित खाद्यान्नका बीउमध्ये ठूलो हिस्सा जिल्लाभित्रै खपत भएको केन्द्रले जनाएको छ । केन्द्रका अनुसार जिल्लाका पालिकाहरुमा उत्पादित अधिकांश बीउ एकअर्को पालिकामै खरिद बिक्री हुँदा बीउको ठूलो हिस्सा आन्तरिक रुपमा खपत भएको हो । जिल्लाका कृषकहरुले थोरै मात्रामा रैथाने र उन्नत जातका बीउ जिल्ला बाहिरबाट खरिद गरेर ल्याएको केन्द्रको तथ्याङ्कमा छ ।
सहकारी, कृषक समूहले उत्पादन गरेको रैथाने बीउबाट कृषकहरु राम्रो उत्पादन लिन सफल भएका छन् । ‘हाईब्रिडको तुलनामा रैथाने बीउले उत्पादन दिदैन् कि भन्ने चिन्ता थियो ।’ स्थानीय कृषक कृष्ण अर्यालले भन्नुभयोे, रैथाने बीउको प्रयोगबाट राम्र्रै उत्पादन लिन सकिएको छ ।’ रैथाने बीउ संरक्षण र प्रवद्र्धनमा जिल्लाका पालिकाले नगदसँगै प्रविधिमा समेत सहयोग गर्दै आएको अर्यालले सुनाउनुभयो ।
गएकै वर्ष जिल्लास्थित सरकारी नियकाबाट अनुदानमा पाँच लाख ६ हजार ७४० किलोग्राम परिमाणको बीउविजन वितरण भएको केन्द्रले जनाएको छ । सबै भन्दा बढि ज्ञान केन्द्रबाटै तीन लाख ६८ हजार २९०, स्थानीय तहबाट एक लाख ३० हजार ८९०, कृषि विकास श्रोत केन्द्र वालिङबाट ६ हजार ९६० र राष्ट्रिय कृषि आधुनिकीकरण कार्यक्रमबाट ६ सय किलोग्राम परिमाणको बीउविजन वितरण भएको थियो ।