स्याङ्जा ६ साउन । नेपाली कांग्रेसका संस्थापक नेता तथा नेपालका प्रथम जननिर्वाचित प्रधानमन्त्री महामानव बि.पि. कोइरालाको ४३ औं स्मृति दिवसको अवसर पारेर मंगलबार नेपाली कांग्रेस अर्जुनचौपारी गाउँपालिकाले वृक्षरोपण गरेको छ ।
अर्जुनचौपारी गाउँपालिका वडा नं. ३ र ४ को सिमानामा रहेको ऐतिहासिक एकानन्द गुफा तथा गौशाला परिसरमा बृक्षरोपण गरिएको हो ।
कार्यक्रममा नेपाली कांग्रेस महाधिवेशन प्रतिनिधि प्रेमराज पौडेल, गाउँपालिकाका उपाध्यक्ष सपना गुरुङ, नेपाली कांग्रेसका नेताहरू शोभाकान्त काफ्ले, मोहदत्त काफले लगायतले बि.पि. कोइरालाको योगदानको स्मरण गर्नुभएको थियो ।
नेपाली कांग्रेस अर्जुनचौपारीका सभापति बिष्णु काफलेको सभापतित्वमा सम्पन्न कार्यक्रममा कांग्रेस नेता बेलप्रसाद गुरुङ्ले स्वागत र सचिव चन्द्रप्रसाद चापागाईले संचालन गर्नुभएको थियो ।
गुफा वरपर बर, पिपल, धुपी, कलकी, कपुर, रुद्राक्ष लगायत २ सय वटा बिरुवा रोपिएका छन् ।
