स्याङ्जा १७ बेैशाख । उपप्रधान तथा सहरी विकास मन्त्री प्रकाशमानसिंह श्रेष्ठले बोलेर भन्दापनि कामबाट नतिजा देखिनुपर्ने बताउनुभएको छ ।
केदारनाथ मन्दिर महायज्ञ मुल समारोह समितिले स्याङ्जाको वालिङमा आयोजना गरेको श्रीमद्भागवत सप्ताह तण्डुलाचल श्रृंगारिक आरती महायज्ञ धार्मिक अनुष्ठानको आज वालिङ खेलमैदानमा उद्घाटन गर्नुहुँदै उहाँले नतिजामुखी काम हुनुपर्नेमा जोड दिनुभएको हो ।
जनताले बोलीमाभन्दा पनि कामको नतिजामा विश्वास गर्ने भएकाले सबै जनप्रनितिधिहरुले नतिजालाई महत्व दिएर अगाडि बढ्नुपर्ने बताउनुभएको हो । पूर्वाधार निर्माणकाक्रममा तीन वटै सरकारमा प्रतिनिधित्व गर्ने जनप्रतिनिधिहरुमा समन्वय र सहकार्य गरेर अगाडि बढ्दै गर्दा विकासले थप गति लिने भएकाले सरसल्लाह गरेर काम गर्न पनि उहाँले सुझाव दिनुभयो ।
पवित्र उद्देश्य राखेर आयोजना गरिएको महायज्ञको पूर्ण सफलताको कामना गर्नुहुँदै उहाँले महायज्ञले राखेका उद्देश्यहरु पूरा गर्नकालागि आफ्नो ठाउँबाट सहयोग गर्ने प्रतिवद्धता जनाउनुभयो ।
कार्यक्रममा प्रतिनिधिसभा सदस्य राजु थापा, गण्डकी प्रदेश सदस्य एवम् पूर्वमन्त्री सरस्वती अर्याल , गण्डकी प्रदेश सभा सदस्य महेश भट्टराई, गण्डकी प्रदेशका पूर्व मन्त्री मेखलाल श्रेष्ठ, गण्डकी प्रदेश सभाका पूर्व सदस्य भागवतप्रकाश मल्ल, समाजसेवी एवम् उद्योगी डोलराज शर्मा पंगेनी, वालिङका उपप्रमुख कविता तिवारी , भागवता लंकार पण्डित नेत्रप्रसाद पराजुली, खगेन्द्रप्रसाद अर्याल, महासचिव भुपराज बगालेले शुभकामना मन्तब्य ब्यक्त गर्नुभएको थियो ।
धार्मिक एवम् ऐतिहासिक दृष्टिले महत्वको स्थलकोरुपमा रहेको केदारनाथको पहिचान संरक्षण गर्दै शिवधामकारुपमा स्थापित गर्नकालागि महायज्ञ आयोजना गरिएको केदारनाथ मन्दिर महायज्ञ मूल आयोजक समितिका संयोजक दिलीपप्रताप खाँणले बताउनुभयो ।
मन्दिर परिसरमा धर्मशाला निर्माण गर्ने, तीर्थयात्रीकालागि आवासको ब्यवस्था गर्ने, संस्कृत भाषा अनुसन्धान केन्द्र (गुरुकूलम्) सञ्चालन गर्ने, किरियापुत्री भवन निर्माण गर्ने, अन्न क्षेत्र स्थापना गर्ने र आर्थिक संकट मोचनकालागि सवा करोड हवन गरिने उहाँले बताउनुभयो ।
केदारनाथ मन्दिर महायज्ञ मूल समारोह समितिको आयोजना र वालिङ नगरपालिकाको सहआयोजनामा सुरु भएको महायज्ञ २३ गतेसम्म सञ्चालन हुने भएको हो । महायज्ञमा भागवतालंकार पण्डित नेत्रप्रसाद पराजुलीले संगीतमय शैलीमा कथा वाचन गर्नुहुने भएको हो ।
वालिङमा रहेको केदारनाथ क्षेत्रलाई शिव धाम निर्माण गर्ने योजनाका साथ वालिङमा महायज्ञ सुरु गरिएको हो । योगी नरहरि नाथलेद्वारा नामाकरण गरिएको केदारनाथ मन्दिरलाई स्त्तरोन्नति गरी धाम निर्माण गर्ने दीर्घकालीन योजना रहेको महायज्ञ आयोजक समितिका संयोजक दिलिपप्रताप खांणले बताउनुभयो ।
सिद्धार्थ राजमार्गसँगै रहेको मन्दिरलाई धार्मिक पर्यटकीय क्षेत्रको रूपमा विकास गर्ने आयोजकको भनाइ छ । उपप्रधानमन्त्री सिंहले केदारनाथ मन्दिर तथा प्रसिद्ध धार्मिक पर्यटकीय क्षेत्र गह्रौंसुरमा रहेको कालिका मन्दिरको समेत दर्शन गर्नुभएको छ । वैशाख २३ गतेसम्म सञ्चालन हुने महायज्ञले वालिङमा केदारनाथ धाम स्थापनाका लागि आधार तयार गर्ने आयोजकको भनाइ छ ।