स्याङ्जा २७ असोज । नेपाली कांग्रेस भित्र नेतृत्व हस्तान्तरण कि पुस्तान्तरण ? भन्ने बिषयले स्थान लिन थालेको छ । नेता गुरु घिमिरे, देवराज चालिसेले आरम्भ गरेको बिशेष महाधिवेशनको अभियानलाई महामन्त्री गगन थापाले नियन्त्रणमा लिएको महाधिवेशन प्रतिनिधि ईन्द्र रिजालले आरोप लगाउनुभएको छ ।
नेतृत्व हस्तान्तरणका लागि नियमित अधिवेशन कि बिशेष महाधिवेशन भन्ने बिषयमा मंगलबार बस्ने कांग्रेस केन्द्रीय समितिको बैठककालागि एजेण्डा सेट हुन सकेको छैन । दोश्रो पुस्ताका अधिकांश नेता पूर्णबहादुर खडका, कृष्ण सिटौला, प्रकाशमान सिंह, प्रकाशशरण महत संकटको समयमा पार्टीलाई संगठितगरी नियमित महाधिवेशनबाटै नेतृत्वका लागि तयार हुनु पर्ने कुरामा जोड दिनु भएको छ ।
नेता शेखर कोइराला मझधरमा उभिएका छन् । उहाका लागि तेस्रो पुस्ता अर्थात गगन थापामा हस्तान्तरण भए आफू नेतृत्वबाट बिमुख हुनुपर्ने चिन्ताबाट भयग्रस्त छन् । देउवा पछिको दोस्रो पुस्ताको नेतृत्व गुम्न नदिन चलाखीपूर्ण जोखना हेरिरहनु भएको छ ।
नियमित या बिशेष महाधिवेशन जे भए पनि केन्द्रीय समितिले पारित नगरेसम्म कार्यान्वयन नहुने हुँदा अहिले नै अनुमान गर्न कठिन छ । तर, दबाव स्वरुप बिशेष महाधिवेशनका लागि ५० प्रतिशत भन्दा बढी महाधिवेशन प्रतिनिधिहरुको हस्ताक्षर संकलन भैसकेको दावी गरिएको छ ।
स्याङ्जाको क्षेत्र नं. १ का २५ महाधिवेशन प्रतिनिधिहरु मध्ये १८ जनाले बिशेष महाधिवेशनको पक्षमा हस्ताक्षर गरेको जानकारी नेता इन्द्र रिजालले दिएका छन् । क्षेत्र नं. २ मा हस्ताक्षर अभियान सोमबार साँझसम्म गरेर केन्द्रमा पठाउने तयारी भएको बुझिएको छ । तर, यो समाचार तयार पार्दासम्म बिशेष महाधिवेशनको पक्षमा कति जना महाधिवेशन प्रतिनिधिले हस्ताक्षर गरे, यकिन हुन सकेको छैंन ।