स्याङ्जा २२ असोज । विद्यार्थीहरूको सिर्जनशील विकासका लागि मध्यनजर राखी दहथुम माध्यमिक विद्यालयले आयोजना गर्दै आएको ‘विद्यार्थीसँग साहित्यकार कार्यक्रम’ सम्पन्न भएको छ ।
भीरकोट नगरपालिका स्थित दहथुमका ११ र १२ कक्षामा अध्ययनरत विद्यार्थीबीच पत्रकार तथा साहित्यकार लक्ष्मण वियोगीसँग बुधबार आज अनौपचारिक सिर्जनशील एवम् साहित्यिक अन्तरक्रिया सम्पन्न गरेको हो ।
कार्यक्रममा वियोगीले झण्डै दुई दशक लामो पत्रकारिताको सिकाइ, ऊर्जा पत्रकारिता तथा पर्यावरणीय लेखन एवम् सिर्जनाका विविध पाटाहरूका बारेमा आफ्ना अनुभव सुनाउनुभयो । सिर्जना एवम् सिकाइका लागि खुला र स्वतन्त्र पारिवारिक तथा सामाजिक परिवेश अपरिहार्य रहेको भन्दै उहाले त्यस्तो सामाजिक संरचनामा विद्यार्थीको सिर्जनशीलताको प्रचुर विकास हुन सक्ने बताउनुभयो ।
वियोगीले आफना १५ वटा कथा सङ्ग्रहीत सत्यम् कथासङ्ग्रह बजारमा आएको जानकारी गराउनुभयो । उहाले पत्रकारितासँगै निबन्ध, नियात्रा, संस्मरण, गीत तथा कविताका क्षेत्रमा कमल चलाउँदै आउनु भएको छ ।
कार्यक्रममा सहायक प्रधानाध्यापक टोलप्रसाद रेग्मी, शिक्षकहरू शेषकान्त खनाल, भूपेन कोइराला , बाबुराम बस्नेतले विद्यार्थीहरूको सर्वाङ्गिण विकासलाई मनन् गर्दैै आगामी दिनमा विद्यालयले यस्ता अनौपचारिक कार्यक्रमलाई पनि निरन्तरता दिनुपर्नेमा जोड दिनुभयो । साहित्यकारसँगका प्रत्यक्ष हुने यस्ता छलफलले विद्यार्थीहरूको सिकाइको दायरा फराकिलो हुने उहाँहरुले बताउनुभयो ।
सोही अवसरमा मौन आवाज निबन्धकृति र सेतो सुनखानीबाबु कविता कृतिका सर्जक एवम् साहित्यकार शम्भु अर्याल र कवि एवं साहित्यकार मिलन समिरले आ आफना केही सिर्जना वाचन गर्नुभएको थियो । करिब दुई दर्जन विद्यार्थी सहभागि रहेको सो कार्यक्रमको सहजीकरण पनि समीरले गर्नुभएको थियो ।