स्याङ्जा १० चैत । गण्डकी प्रदेशसभा सदस्य सरस्वती अर्यालले सकारात्मक सोच र भावले महिलाहरूका बहुआयामिक क्षमताको विकास हुने बताउनुभएको छ । सुख, शान्ति, समृद्धि सहित सुशासनका लागि महिला नेतृत्व सक्षम रहेको जनाउदै अव सबै तहमा महिला नेतृत्व आवश्यकता औल्याउनुभयोे ।
सामाजिक विकास कार्यालय स्याङ्जाको आयोजना र भिरकोट नगरपालिकाको समन्वयमा आइतवार भिरकोटमा आयोजित सकारात्मक सोच सहितको नेतृत्व विकास कार्यक्रमको उदघाटन गर्दै उहाले आफनो घरपरिवारको विस्वास जित्दै समाजिक तथा राजनीतिक क्षेत्रमा लाग्न समेत सुझाव दिनुभयो । आफैबाट सकारात्त्मक भाव सृजितगरि समाज र देशमा सुख, शान्ति कायम राख्दै अघि बढ्नु पर्नेमा बताउनुभयो । हर समस्याका समाधानका उपाय हुने जनाउदै समस्या र अवरोध चिर्दे अभिभावक तथा अग्रजको परामर्श लिएर अघि बढ्न आग्रह गर्नुभयो ।
उहाँले भन्नुभयो, ‘विगतभन्दा आज सबै क्षेत्रमा महिलामैत्री वातावरण राम्रो बन्दै गएको छ । भोली झनै राम्रो हुनेछ । यसतर्फ ध्यान दिदै ससाना कुरामा टिकाटिप्पणी गर्नुभन्दा सकारात्मक सोचका साथ अघि बढ्नुपर्छ । नेतृत्व लिन आफुलाई निखार्नुपर्छ । लक्ष्यमा पुग्न परिश्रम गर्नुहोस् । असम्भव छैन ।’
गण्डकी प्रदेशका पूर्वमन्त्री समेत रहनु भएका अर्यालले समाजसेवाका निम्ति राजनीतिका लागेको जनाउदै महिला दिदीबहीनीका हक, हित, अधिकारका पक्षमा काम गर्नु पहिलो प्रथामिकतामा रहेकोे भन्नुभयो ।
कार्यक्रममा भिरकोट नगरप्रमुख गोविन्दकुमार कर्मचार्यले जीवनमा आउने हरेक उतार चढावलाई सहज रूपमा स्वीकार गर्दै कार्यमा सफलता हासिल गर्न सकारात्मक तथा नेतृत्व विकास आवश्यक रहेको बताउनुभयो । आउदा दिनमा पनि यस्ता खालका कार्यक्रमलाई निरन्तरता दिईने बताउनुभयो ।
उपप्रमुख भगवती अर्यालले सकारात्मक सोचले कठिन परिस्थितिमा पनि सहजता ल्याउने भन्दै महिलाहरूको नेतृत्व विकासमा जोड दिनुपर्ने बताउनुभयो ।
नगर प्रवक्ता दिपेन्द्र केसी, वडा नं. ८ का अध्यक्ष नन्दलाल खनाल, पत्रकार भवानी अधिकारी, स्वास्थ्य स्वयंसेविका आमा समूहका अध्यक्ष एवं सहभागि मन्जुश्री अधिकारी लगायतले बिबिध बिषयगत प्रशिक्षणको प्रभावकारिता सहित आवश्यकताका बारेमा जोड दिनुभएको थियो ।
प्रहरी निरीक्षक प्रवेश तिवारीले २०८१ सालको श्रावणदेखि फागुन महिनासम्म स्याङ्जामा १४ महिला र २४ पुरुषले आत्महत्या गरेको तथ्यांक बताउदै उहाँले आत्महत्या न्यूनीकरणका लागि परिवार, समुदाय तथा सरकारी–गैरसरकारी निकायको निरन्तर भूमिका आवश्यक रहेको बताउनुभयो ।
यस्तै मनोपरामर्शदाता विजय राईले सकारात्मक सोचसहित जीवनलाई सरल, सहज र दीर्घकालीन बनाउन मनोपरामर्श प्रभावकारी हुने बताउनुभयो ।
कार्यक्रममा बोल्ने कला र नेतृत्व विकास सम्बन्धी भवानी अधिकारीले र सकारात्मक सोचका विषयमा मधु अधिकारीले प्रशिक्षण दिनुभएको थियो ।
कार्यक्रममा कार्यपालिका सदस्य सहित जनप्रतिनिधि, महिला स्वास्थ्य स्वयंसेवीकाहरु र स्वास्थ्य स्वयंसेविका आमा समूह सहित कर्मचारीगरि १ सय २० जना सहभागि थिए ।
सामाजिक विकास कार्यालयका प्रमुख जीवन पौडेलको अध्यक्षतामा सम्पन्न कार्यक्रमको बालमैत्री सहजकर्ता विष्णुमाया काफ्लेले संचालन गर्नुभएको थियो ।
सकारात्मक सोचले व्यक्तिको आत्मविश्वास, उत्साह र नेतृत्व क्षमतामा बढाउने उदेश्यले मानसिक स्वास्थ्य, आत्महत्या न्यूनीकरण, नेतृत्व विकास र सकारात्मक सोच सम्बन्धी प्रशिक्षण दिइएको प्रमुख पौडेलको भनाई छ ।
