स्याङ्जा १३ असार । भीरकोट नगरपालिकाले आर्थिक वर्ष २०८२÷८३ को नीति तथा कार्यक्रम र बजेट सार्वजनिक गरेको छ । १६ औं नगर सभामा नगर प्रमुख गोविन्द कुमार कर्माचार्यले नीति तथा कार्यक्रम र नगर उपप्रमुख भगवती रेग्मी अर्यालले बजेट सार्वजनिक गर्नुभएको हो ।
नगर प्रमुख कर्माचार्यले प्रस्तुत गरेको नीति तथा कार्यक्रममा रणनीतिक महत्वका मुख्य सडकहरू बयरघारी– सुन्दर बजार– मोहनडाँडा– हातेमालोचोक सडक र बयरघारी बिरुवा सडकको स्तरोन्नतिलाई प्राथमिकता दिइएको छ । सबै वडाका ग्रामीण सडकलाई स्तरोन्नति र सरसफाई गरि बाह्रै महिना सवारी चल्ने बनाउने लक्ष्य राखिएको छ ।
नीति तथा कार्यक्रममा आँधिखोला तटबन्धन, कृषि औजार र सिंचाइमा ५० प्रतिशत अनुदान, भीरकोट पार्क, गडहरे गुफा, सुन्दरचौर, स्वरेक मैदान जस्ता पर्यटकीय स्थलको व्यवस्थापन, भीरकोट कृषि विकास परियोजना, विपद् व्यवस्थापन, बालमैत्री स्थानीय शासनको दिगोपना, फोहरमैला व्यवस्थापन, शैक्षिक गुणस्तर वृद्धि, गाई संरक्षण तथा गौशाला व्यवस्थापनलाई प्राथमिकता दिइएको छ ।
यसैगरी, आगामी आर्थिक वर्ष २०८२÷८३ का लागि ८२ करोड २८ लाख ५२ हजार रुपैयाँ विनियोजन गरिएको छ । उक्त विनियोजित रकम मध्ये चालू तर्फ ६३ करोड ९७ लाख ८६ हजार रुपैयाँ अर्थात ७७ दशमलब ७५ प्रतिशत रहेकोमा संघिय शसर्त अनुदानतर्फ ३२ करोड ५४ लाख रुपैयाँ अर्थात ३९ दशमलब ५५ प्रतिशत र नगरपालिकातर्फको चालू खर्च १६ करोड ४१ लाख ८६ हजार रुपैयाँ अर्थात १९ दशमलब ९५ प्रतिशत छ ।
कुल विनियोजित रकम मध्ये पुँजिगत तर्फ १८ करोड ३० लाख ६६ हजार रुपैयाँ अर्थात २२ दशमलब २५. प्रतिशत र सामाजिक सुरक्षा तर्फ १८ करोड रुपैयाँ अर्थात २१ दशमलब ८८ प्रतिशत रहेको छ ।
