स्याङ्जा २१ असोज । भीरकोट उद्योग वाणिज्य संघ स्याङ्जाले रमाइलो मेलामा ब्यापारिक कारोवार नगर्न र नगराउन आग्रह गरेको छ । संघले मंगलबार एक ज्ञापनपत्र जारी गर्दै सो का बारेमा जानकारी गराएको हो ।
संघद्धारा जारी सो ज्ञापनपत्रको बोधार्थ अर्थ मन्त्रालय र मन्त्रालय अन्र्तगतका नियमक निकाय, बिभाग, कार्यालय, जिल्ला प्रशासन कार्यालय स्याङ्जा र जिल्ला समन्वय समिति स्याङ्जालाई पनि प्रेषित गरिएको छ ।
संघका अध्यक्ष नुवादत्त अर्यालको नेतृत्वमा भीरकोट नगरपालिकालाई ज्ञापनपत्र बुझाउदै हाल देशको बिषम परिस्थिति र आर्थिक शिथिलताका बाबजूद स्थानीय सरकारलाई पटक पटक सो का बारेमा आग्रह गरेकोमा आफुहरुको आग्रहलाई वेवास्तागरिएको उल्लेख छ ।
रमाइलो मेलाका नाउमा ब्यापारिक स्टलराखी स्थानीय ब्यापारीहरुलाई निरुत्साहित गर्न खोजिएको भनिएको छ । स्थानीय सरकारले नगरका ब्यापारी संघसंस्था बाहेह क्लव, आमा समूह, जातिय समाजलाई ब्यापारीक मेला गर्न सहमति दिदा संघसंग सहमति नगरेको पनि पत्रमा जनाइएको छ ।
साथै, स्थानीय सरकारलाई ब्यापारीक कर लगायत सम्पूर्ण करहरु तिर्दै आएकोमा आजका मितिदेखि संघमा आवद्ध उद्योगी, ब्यापारी, ब्यवसायी एवं नगरबासीलाई समेत स्थानीय सरकारलाई कुनै पनि प्रकारका स्थानीय कर नतिर्न भनिएको छ ।
‘रमाइलो मेला गर्नुहोस्, राष्ट्रिय तथा स्थानीय कलाकार बोलाउनुहोस्, खेल खेलाउनुहोस्, मनोरंजन लिनुहोस्, दिनुहोस्, तर रमाइलो मेलाका नाउँमा ब्यापारिक स्टल राखेर ब्यापारिक कारोवार नगर्नुहोस् भन्ने हाम्रो आग्रह हो’ अध्यक्ष अर्यालले भन्नुभयो ।
संघका अध्यक्ष अर्यालले मंगलबारै भीरकोट नगरउपप्रमुख भगवती अर्याल, प्रमुख जिल्ला अधिकारी ईश्वरीप्रसाद अर्याल र जिल्ला समन्वय समिति प्रमुख श्रीप्रसाद जि.टी.का कार्यकक्षमापुगी सो ज्ञापनपत्र बुझाएका छन् ।
स्थानीय क्लवले असोज २३ देखि कात्तिक २ गतेसम्म रमाइलो मेला गर्न लागेको छ । मेलामा ब्यापारिक स्टल समेत राख्ने भएपछि संघले त्यसो नगर्न समेत ज्ञापनपत्र मार्फत स्थानीय सरकार र सरोकारवालालाई ध्यानाकर्षण गराएको जनाएको छ ।