स्याङ्जा ३१ भदौ । आईतवार र सोमबार परेको अविरल बर्षाका कारण पुतलीबजार नगरपालिका ३ स्थित चिचिकुनाका ६ घर र ६ गोठ बस्नका लागि जोखिममा छन ।
राधाकृष्ण मन्दिर परिसरमा रहेका ईश्वरीप्रसाद मरासिनी, भवानी मरासिनी, पिताम्बर मरासिनी, हुमाबती दोरंगा, भवानीदत्त दोरंगाा र नबिन दोरंगाका घर तथा गोठहरु बस्नका लागि जोखिममा देखिएका हुन ।
एउटा बस्ती नै जोखिम देखिएपछि पुतलीबजार नगरप्रमुख तुलसीराम रेग्मी, प्रमुख जिल्ला अधिकारी इश्वरीप्रसाद अर्याल, प्रहरी उपरीक्षक दधिराम न्यौपाने, राष्ट्रिय अनुसन्धान उपनिर्देशक जईन्द्र उपाध्याय, प्रमुख प्रशासकिय अधिकृत धर्मराज ढुंगााना, सामाजिक विकास कार्यालय प्रमुख जीवन पौडेल, नागरिक समाजका अध्यक्ष ओमप्रकाश शर्मा लगायतको प्राबिधिक टोलीले मंगलबार स्थलगत अध्ययन, अवलोकनगरी प्रभावित स्थानीयबासीसंग छलफल गरेका छन ।
पानी पर्ने क्रम जारी रहेको जनाउदै तत्काल सो बस्तीमा नबस्न सुझाव दिदै अस्थायी बास सहित आवश्यक सहयोगका लागि नगरपालिकाले सहयोग गर्ने नगरप्रमुख तुलसीराम रेग्मीले सुझाव दिनुभयो ।
प्रमुख रेग्मीका अनुसार, ‘बर्षा रोकिएको छैंन, हिजोभन्दा आज जमिन फाट्ने क्रम बढेको छ। तपाईंहरु सुरक्षित स्थानमा बस्नुहोस्। पशु तथा अन्नपात, घरभित्रका सामग्री सुरक्षित स्थानमा राख्नुहोस्। तत्कालका लागि गास, बास सहितका आवश्यक सहयोग नगरपालिकाले उपलब्ध गराउनेछ स्थानीय सरकार तपाईहरुका साथमा छ जनधनको सुरक्षाका गर्नुहोस ।
प्रमुख जिल्ला अधिकारी इश्वरीप्रसाद अर्यालले एउटा बस्ती नै जोखिममा देखिएको जनाउदै भूर्गभबिद् बोलाएर जमिन परिक्षण गरेर मात्र बस्न उपयुक्त छ वा छैन एकिन गर्नु पर्ने सुझाउनुभयो । ‘विपद ब्यवस्थापन समितिको बैठकले भूगर्भविद झिमाई जमिनको जाँचबुझ गर्ने निर्णय गर्नेछौं र कामलाई छिटो अघि बढाउनेछौं’ जिल्ला स्तरीय विपद ब्यवस्थापन समितिका संयोजक समेत रहेका प्रजिअ अर्यालले जानकारी दिनुभयो ।
समस्या बिस्तारै बढेको छ। घाम लाग्दा र पानी पर्दा पनि जोखिम देखिएको छ। पहिलो जनको अनि धनको क्षति हुन नदिन तत्काल सुरक्षित स्थानमा बस्न प्रहरी उपरीक्षक दधिराम न्यौपानेको भनाई छ। तत्कालका लागि आफन्त तथा नजिकका सुरक्षित स्थान खोजेर बस्न प्रहरी प्रमुख न्यौपानेले सुझाव दिनुभयो । सामान ओसार पसार तथा अस्थायी संरचना निर्माणकालागि नगर प्रहरी सहित जिल्ला प्रहरीले सहयोग गर्ने पनि उहाहरुका भनाई छन ।
प्रभावित स्थानीयबासी किसान हुन। सबै घरमा भैसीपालन गर्दै आएका छन्। भैसी, बाख्रा लगायतका बस्तुभाउ र अन्नपात समेत रहेकाले तत्काल घर छाडेर निस्कनै समस्या रहेको गीता मरासिनीको भनाई छ ।