स्याङ्जा १४ भदौ । स्याङ्जामा यस वर्षको बालदिवसमा बालबालिकाहरु बीच पञ्चेबाजा प्रतियोगिता हुने भएको छ । सामाजिक विकास कार्यालय स्याङ्जामा आयोजना हुने प्रतियोगितामा जिल्लाका बालबालिकाहरु सहभागि हुने भएका हुन् ।
बालबालिकाको अधिकार र बालबालिकाको आवाजलाई गायन र पञ्चेबाजाको संगित मार्फत् थप बुलन्द बनाउन र बालबालिकामा रहेको अन्तरनिहित प्रतिभा प्रस्फुटनमा सहयोग होस् भन्ने उद्धेश्यले कार्यक्रम आयोजना गर्न लागिएको समाजिक विकास कार्यालय स्याङ्जाका प्रमुख जीवन पौडेलले जानकारी दिनुभयो ।
संस्कृतिको संरक्षण, परम्परागत सीपको पुस्तान्तरण, हाम्रो उत्सव, विवाह र चाडपर्वको लागि पञ्चेबाजा संरक्षणको मा टेवा पुग्ने कार्यालयको विश्वास रहेको छ । जिल्लाका ११ वटै स्थानीय तहबाट कम्तिमा २ वटा समूहको दरले सहभागि हुनको लागि यही भाद्र २२ गते सम्म समूह दर्ता गर्न सकिने कार्यालयले जनाएको छ । कक्षा एक देखि दशसम्म पढ्दै गरेका बालबालिका सहभागि हुने कार्यक्रमा एउटा टोलिमा छात्रा र छात्र दुवै गरेर बढीमा ८ जना सहभागि हुन सक्नेछन् ।
विद्यालय, टोल, बालक्लब , वडा , पालिका स्तरीय जुनसकै समूह निर्माण गर्न सकिनेछ भने बालधिकार सम्बन्धी शब्द समावेश गरी गीत गाएर बाजाको संगीत बजाउनेलाई मूल्यांकनमा प्राथामिकता दिइने कार्यालयले जानकारी दिएको छ । प्रतियोगितामा प्रथम, द्धितीय, तृतीय र सान्तवनालाई क्रमशः १५ हजार, १२ हजार, ९ हजार , ६ हजार र प्रमाणपत्र प्रदान गरिने भएको छ ।
साथै उक्त कार्यक्रमा दमाहा, झ्याली, ट्याम्को, ढोलकी र सनाई सबैभन्दा उत्कृष्ट बजाउनेलाई समेत पुरस्कार प्रदान गरिने भएको छ ।
जिल्ला बाल अधिकार समिति र जिल्ला बालसञ्जालको सहयोग र समन्वयमा हुने कार्यक्रम बालदिवसको दिन यहि भाद्र २९ गते जिल्ला सदरमुकाम स्थित त्रिभुवन आदर्श नमुना मा.वि. को प्रागणमा सञ्चालन हुने बताइएको छ ।