स्याङना २३ फागुन । पुतलीबजार नगरपालिकामा वैदेशिक रोजगारीमा रहेका श्रमिकका परिवारसंग छलफल तथा अन्तरक्रिया कार्यक्रम भएको छ ।
नेपाल सरकार श्रम, रोजगार तथा सामाजिक विकास मन्त्रालय वैदेशिक रोजगार बोर्ड काठमाडौंको आयोजनामा भएको कार्यक्रमको उद्घाटन गर्दै नगर प्रमुख तुलसीराम रेग्मीले वैदेशिक रोजगारीमा जानुपुर्व र रोजगारी कै शिलशिलामा रहँदा त्यहाँको बारेमा सबै जानकारी हुनु र रोजगारीका विषयमा सचेत हुन आवश्यक रहेको बताउनुभयो । वैदेशिक रोजगारीका क्रममा झेल्नुपर्ने सबै अफ्ठ्याराहरुका बारेमा जानकार रहने कुरामा नगर प्रमुख रेग्मीको जोड थियो ।
बोर्डका शाखा अधिकृत कल्पना खनाल रेग्मी वैदेशिक रोजगारीमा जानुपुर्व, गएपछि, फर्किएपछि र अफ्ठ्यारोमा परेपछिका विविध समस्या समाधानका उपायहरुका बारेमा कार्यपत्र प्रस्तुत गर्नुभएको थियो भने बोर्डका नायब सुब्बा आशिष भण्डारीले कल्याणकारी सेवाका बारेमा कार्यपत्र प्रस्तुत गर्नुभएको थियो ।
सो अवसरमा वैदेशिक रोजगारीबाट फर्कनुभएका खुमकान्त रेग्मीले आफ्नो अनुभव संगै धारणा राख्नुभएको थियो । बोर्डका निर्देशक सुशिल आचार्यको अध्यक्षतामा सम्पन्न कार्यक्रममा नगर उप प्रमुख देवी अर्यालले स्वागत एवम् कार्यक्रमको सञ्चालन बोर्डका शाखा अधिकृत कल्पना खनाल रेग्मीले गर्नुभएको थियो ।
स्याङ्जा जिल्ला वैदेशिक रोजगारीका क्रममा विदेश जानेहरुमा गण्डकी प्रदेश मै दोस्रो स्थानमा रहेको बताइएको छ । कार्यक्रममा वैदेशिक रोजगारीमा रहेका परिवारका २ सय भन्दा बढीको सहभागिता रहेको थियो ।