स्याङ्जा १२ फागुन । नेपालकै पहिलो नवग्रह मन्दिरमा विजया एकादशीको अवसर पारेर सोमबार साँझ एक करोड २५ लाख भन्दा बढी बात्ती बालिएको छ। अर्जुनचौपारी स्थित पञ्चकन्या मन्दिर, षट्कोण शिवालय र नवग्रह मन्दिरमागरि ती लक्ष्यबात्ती बालिएका हुन ।
स्याङ्जाको अर्जुनचौपारी गाउँपालिकामा १ मा नबनिर्मित नवग्रह मन्दिरमा फागुन ६ गतेदेखि गीता ज्ञान तथा धार्मिक महोत्वस जारी छ। शिवरात्रीका दिनसम्म संचालन गरिने धार्मिक महोत्सबमा आजसम्म ५० हजार भन्दा बढी भक्तजनले नवग्रहको पुजाआराधना गरेका छन ।
एक सय ४४ वर्षमा पर्ने शुभमुर्हत सहित महाशिवरात्रीको अवसर पारेर नवग्रह मन्दिरको प्राण प्रतिष्ठा सहित धार्मिक महोत्सव गरिएको हो। गएको वर्ष शिवरात्रीको दिन शिलान्यास गरिएको यो मन्दिर बर्षदिनमै निर्मित मुलुककै पहिलो नवग्रह मन्दिर हो।
महोत्सवमा ४ वेद, गायत्री मन्त्रद्वारा सवालाख हवन, सन्ध्याकालिन महाआरती तथा भजनकृतन गरिएको अर्जुनचौपारीका अध्यक्ष प्रकाश तिवारीले जानकारी दिनुभयो । उहाका अनुसार, ‘सुख, शान्ति, समृद्धिसंगै अर्जुनचौपारीलाई धार्मिक स्थलको गन्तब्य बनाउन धार्मिक महोत्सवसंगै लक्ष्यबात्ती बालिएको हो।’ महोत्सवमा आचार्य श्री चैतन्यकृष्ण महाराज गुरु प्रमुख वाचक हुनुहुन्छ ।
एक सय ५७ रोपनी क्षेत्रफलमा फैलिएको वनमा नवभुज आकारको २७ फिट अग्लो नवग्रह मन्दिर बनाइएको छ। यस मन्दिरमा रहने पिल्लरको सबैभन्दा माथि आकाशतर्फ फर्काएर सौर्यमण्डलीय ब्रह्माण्डको प्रतीक छन्। पिल्लरको १४ फिटमा सूर्य, शुक्र, केतु, चन्द्र, मंगल, बुध, शनि, बृहस्पति र राहुगरि नवग्रह प्रतीक राखिएका छन्। पिल्लरको नौवटा भुजा ग्रह अनुसार रंगका छन्।
मन्दिरमा षट्कोण शिवालय र यसको बीचमा पशुपतिनाथ जस्तै पञ्चमुखी शिवलिङ्ग र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएका छन्।
मन्दिरमा षट्कोणको एक छेउबाट प्रवेश गरेर गणेश, कुलदेवता (तेलको पोखरी), इष्टदेवताको पूजा गरेर बीचमा रहेको पञ्चमुखी शिवलिङ्गको दुई पटक घुमेर पूजा गरेसङ्गै हनुमान, लक्ष्मी, कालभैरवको पूजा गरेर बाहिर निस्किन सकिनेगरि बनाइएको छ। भक्तजनलाई आवत जावत र पुजाअर्चनामा समेत सहज पुग्नेगरि मन्दिर निर्माण गरिएको छ।
नौमध्ये एक चक्रमा हरेक दिन र नवग्रह मन्दिरमा शनिबार पुजा गर्न पाइनेछ। सौर्यमण्डलीय ब्रह्माण्डको प्रतिमामा भने गणेश चतुर्थीका दिन बर्षको एक दिन पुजा हुने पालिकाका उपाध्यक्ष सपना गुरुङ्ले जानकारी दिनुभयो ।
