स्याङ्जा २१ मंसिर । स्याङ्जाको अर्जुनचौपारी र दार्चुलाको अपिहिमाल गाउँपालिका बिच भगिनी सम्बन्ध सम्झौता भएको छ ।
पर्यटनदेखि शिक्षा, स्वास्थ्य, कृषि, वातावरणीय संरक्षण र सुशासनसम्मका क्षेत्रलाई समेट्दै पाँच वर्षे सहकार्यको रोडम्याप दुबै पालिकाले अघि सारेका हुन् । सम्झौतामा अर्जुनचौपारी गाउँपालिकाका अध्यक्ष प्रकाश तिवारी र अपिहिमाल गाउँपालिकाका अध्यक्ष भक्तसिंह ठेकरे बोहराले हस्ताक्षर गर्नुभएको हो
नेपाल सरकारको स्थानीय सरकार सञ्चालन ऐन २०७४ ले प्रोत्साहन गरेको अन्तर–पालिका सहकार्यलाई व्यवहारिक बनाउँदै दुर्गम हिमाली पर्यटन गन्तव्यको सम्भावनासहित अपिहिमाल क्षेत्र र सांस्कृतिक तथा धार्मिक आकर्षणहरूले भरिएको अर्जुनचौपारीबिच साझा पहलको मार्ग निर्धारण गरिएको हो । सम्झौताले दुवै पालिकाका विशिष्ट आकर्षणलाई राष्ट्रिय तथा अन्तर्राष्ट्रिय तहमा प्रवर्धन गर्ने लक्ष्य राखेको छ ।
अपिहिमाल बेसक्याम्प, कालीधुंगा, छिप्राटालजस्ता हाई अल्टिट्युड गन्तव्य तथा अर्जुनचौपारीको नवग्रह मन्दिर, डहरे देउराली र बोटानिकल म्याथमेटिकल पार्कलाई प्रचारप्रसार, संरक्षा र पूर्वाधार विकासका लागि संयुक्त रुपमा अघि बढाइनेछ । हिमाली ट्रेकिङ, सांस्कृतिक उत्सव, साहसिक पर्यटन र पर्यटक सुरक्षाका विषयमा दुवै पालिकाले साझा कार्यक्रम सञ्चालन गर्नेछन् ।
यस्तै विद्यालय–विद्यालय साझेदारी, शिक्षक–विद्यार्थी आदानप्रदान, चेन्ज मेकर्स क्लब जस्ता युवा नेतृत्व परियोजनामा सहकार्य हुने सम्झौतामा उल्लेख छ । डिजिटल साक्षरता, ई–गभर्नेन्स, सीप विकास तथा उद्यमशीलता प्रवर्धनमा पनि संयुक्त कार्यक्रम अघि सारिनेछ ।
यस्तै, प्राथमिक स्वास्थ्य सेवा, जनस्वास्थ्य अभियान, महिला–बालबालिका–वृद्ध र विपन्न वर्गका लागि सशक्तिकरण कार्यक्रमलाई प्राथमिकता दिइनेछ । मानसिक स्वास्थ्य, पोषण र समुदाय–मुखी स्वास्थ्य प्रवर्धनमा अनुभव आदान–प्रदान गरिनेछ ।
यस्तै उच्च मूल्यका बाली, जैविक कृषि, पशुपालन र कृषि प्रविधिमा दुवै पालिकाले संयुक्त अध्ययन र तालिम कार्यक्रम सञ्चालन गर्नेछन् । जल–वन–माटो संरक्षण, जलवायु परिवर्तनको प्रभाव न्यूनीकरण र विपद् जोखिम कमीका क्षेत्रलाई प्रमुख सहकार्य क्षेत्रका रूपमा समेटिएको छ ।
यस्तै दुर्गम क्षेत्रका पूर्वाधार योजना, यातायात, सूचना तथा सञ्चार र सामुदायिक पूर्वाधार विकासमा अनुभव आदानप्रदान हुने उल्लेख छ । दुवै पालिकाले डिजिटल प्रशासन, पारदर्शिता र सुशासन सुधारका क्षेत्रमा पनि सहयोग गर्ने सहमति जनाएका छन् । दुवै पालिकाले “भगिनी सम्बन्ध समन्वय समिति” गठन गर्ने, वार्षिक कार्ययोजना बनाउने तथा प्रगति मूल्यांकन गर्ने व्यवस्था राखिएको छ ।