स्याङ्जा २८ फागुन । अर्जुनचौपारी गाउँपालिकामा भएको धार्मिक महोत्सवबाट ७७ लाख ६८ हजार रुपैया सङ्कलन भएको छ ।
अर्जुनचौपारी गाउँपालिका –१ जलबराह धार्मिक वनमा निर्माण गरिएको नेपालको पहलो नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सव फागुन ६ देखि १४ गतेसम्म सञ्चालन भएको थियो ।
एक सय ४४ बर्षमा परेको महाकुम्भको साइतमा गरिएको महोत्सवबाट सहयोग रसिदबाट ५० लाख ४ हजार, बैंक क्युआरबाट ९ै लाख ५ हजार रुपैंया संकलन भएको मन्दिर व्यवस्थापन समितिका अध्यक्ष भरतराज पोख्रेलले जानकारी दिनुभयो ।
यसैगरी, दानपेटिकाबाट १६ लाख २६ हजार, चामल, धान, आलू, आँटा अन्न तथा खाद्य सामग्री बिक्रीबाट २ लाख ३१ हजार रुपैया जम्मा भएको छ ।
धार्मिक महोत्सवमा एक लाख २५ हजार भक्तजनले पूजाआजा तथा दर्शन गरेका थिए । महोत्सवमा एक करोड २५ लाख लक्ष्यबत्ती बालिएको र चार बेदको पाठ पारायण, गायत्री मन्त्रद्वारा सवा लाख हवन, धार्मिक अन्तरक्रिया, सन्ध्याकालीन महाआरती तथा भजनकृतन गरिएको थियो ।
करिब १ सय ५७ रोपनी क्षेत्रफलमा फैलिएको वनमा नवभूज आकारको आकाशतर्फ फर्केको २७ फिट अग्लो नवग्रह मन्दिर बनाइएको छ । आकाशतर्फ फर्काएर सौर्यमण्डलीय ब्रह्माण्डको प्रतीक राखिएको छ ।
पिल्लरको सूर्य, शुक्र, केतु, चन्द्र, मंगल, बुध, शनि, बृहस्पति र राहुका प्रतीक राखिएको छ । पिल्लरको नौवटा भुजामा ग्रह अनुसारका रङ लगाइएको छ । नवग्रह मन्दिरसङ्गै शिवालय बनाइएको छ भने यसको बिचमा पशुपतिनाथको जस्तै पञ्चमुखी शिवलिङ्ग र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएका छन ।