स्याङ्जा २२ चैत । पुतलीबजार नगरपालिकाका अपांगता भएका ब्यक्तिलाई लक्षित गर्दै बाख्रा पालन तालिम सहित पाठी बितरण गरिएको छ । पुतलीबजार नगरपालिकाका १० जना अपांगता भएका ब्यक्ति तथा उहाका अभिभावकलाई पाठी उपलब्ध गराइएको हो ।
अपांगता सशक्तिकरण तथा सामुदायिक विकास केन्द्र नेपाल पुतलीबजार स्याङ्जाको आयोजना तथा पुतलीबजार नगरकार्यपालिकाको सहयोगमा अपांगता भएका ब्यक्तिहरुका लागि पाठी बितरण गरिएको हो ।
पाठी हस्तान्तरण कार्यक्रममा बोल्दै नगरप्रमुख तुलसीराम रेग्मीले अनुदान स्वरुप उपलब्ध गराइएको सहयोगको सदुपयोग गर्दै आयआर्जन बढाउन सुझाव दिनुभयो । नगरपालिकाले अपांगता भएका ब्यक्तिका सहयोगका लागि पहिलो प्राथमिकतामा राखेको जनाउदै पशु बिमा, पशुको निशुल्क स्वास्थ्य परिक्षण र औषधीको उपलब्धता, समय समयमा स्वास्थ्य शिविर जस्ता सेवा प्रवाह गर्दै आएको र आउदा दिनमा पनि निरन्तरता दिईने बताउनुभयो ।
बाख्राले एक वेतमा २÷३ वटा पाठापाठी पनि ब्याउने हुदाँ दाना पानीको उचित ब्यवस्थापन गर्न सके राम्रो आयआर्जन गर्न सकिनेमा उहाले जोड दिनुभयो । बाख्रा पालनमा धेरै ध्यान दिनुपर्ने जनाउदै अकस्मात पशु मरेमा क्षतिपूर्तिका लागि आवश्यक कागजात सहित वडा तथा सम्बन्धित निकायमा जानकारी गराउन सुझाव दिनुभयो ।
कार्यक्रममा उपप्रमुद देवी अर्यालले बाख्राको लालनपालनका ध्यान दिनुपर्ने बताउनुभयो । अपांगताका क्षेत्रका क्रियाशिल संस्था र नगरपालिकाले सहकार्य गर्दै बिगतदेखि काम गर्दे आएको स्मरण गराउनुभयो ।
कार्यक्रममा पुतलीबजार सामाजिक विकास समितिका संयोजक एवं वडाअध्यक्ष इमबहादुर सेन, पशु सेवा शाखा प्रमुख डा अनिल गौतम, स्याङ्जा अपांग समाज स्याङ्जाका अध्यक्ष राम शर्मा पोखरेल, पत्रकार भवानी अधिकारी लगायतले अपांगता भएका ब्यक्तिका लागि पाठी बितरण कार्यक्रम प्रभावकारि हुनेमा जोड दिनुभयो ।
अपांगता सशक्तिकरण तथा सामुदायिक विकास केन्द्र नेपाल पुतलीबजार स्याङ्जाका अध्यक्ष युवराज पराजुलीको अध्यक्षतामा सम्पन्न कार्यक्रमको संचालन सचिव नारायणप्रसाद रेग्मीले गर्नुभएको थियो ।
पाठी बितरण गर्नुपूर्व डा. अनिल गौतमले पाठीका स्वास्थ्य परिक्षण सहित बाख्रापालन सम्बन्धि प्रशिक्षण दिनुभएको थियो । अध्यक्ष युवराज पराजुलीले पाठी पालक किसानले पालना गर्नुपर्ने शर्तका बारेमा जानकारी गराउदै संस्थाले पाठीको विमा समेत गरिदिएको जानकारी गराउनुभयो ।
बीउ पुजीका रुपमा पाइएका पाठी ब्याएपछि एउटा पाठी फेरि अर्कौ अपांगता भएका ब्यक्तिलाई बितरण गर्नु पर्ने हुन्छ । स्थानीय बाख्रामा ब्रोयर क्रस गरिएका पाठी बितरण गरिएका हुन । जसका पाठी र मासुको मुल्य समेत अन्य भन्दा धेरै राम्रो मानिएको छ ।
