स्याङजा १३ चैत । स्याङ्जा जिल्ला अपांग समाज स्याङ्जाको आयोजना तथा सामाजिक बिकास कार्यालय स्याङ्जाको समन्वयमा अपांगता सवालमा सरोकारवालाबीच अन्र्तक्रिया गरिएको छ । अपांगता भएका ब्यक्ति एवं यातायात ब्यवसायीहरुसंग अन्र्तक्रिया सहित सन्देशमूलक सामाग्री पनि सार्वजनिकरण गरिएको छ ।
कार्यक्रमको उदघाटन गर्दै प्रमुख जिल्ला अधिकारी सुनिता नेपालले राज्यद्धारा उपलब्ध गराईएका सेवा सुबिधा अपांगता भएका ब्यक्तिलाई सहजरुपमा उपलब्ध गराउन सरोकारवालालाई सुझाव दिनुभयो । अपांगता भएका ब्यक्तिले सहज रुपमा सेवा पाउन नसकेको गुनासा लिएर आफु समक्ष आउने गरेको जनाउदै प्रजिअ नेपालले यस्तो हुन नदिन यातायात ब्यवसायी सहित सरोकारवाला सबैले ध्यान दिनुपर्ने बताउनुभयो ।
बिद्यार्थी, यातायात ब्यवसायी, चालक, सहचालक लगायत सरोकारवालालाई सचेतना कार्यक्रम मार्फत प्रचलित सेवा सुबिधाका बारेमा सूसूचित गराउनु पर्नेमा उहाले जोड दिनुभयो ।
कार्यक्रममा अपांगता शसक्तिकरण सामुदायिक विकास केन्द्र स्याङ्जामा अध्यक्ष युवराज पराजुलीले अपांगता सम्बन्धि र यातायात सेवामा अपांगता भएका ब्यक्तिले पाउने सुबिधा, नियमानुसारको छुट लगायत नितिगत ब्यवस्थाका बारेमा कार्यपत्र प्रस्तुत गर्नुभएको थियो ।
सोही कार्यक्रममा दृष्टिबिहिन रुद्रप्रसाद शर्मा, बौद्धिक अपांगताका अभिभावक कुलप्रसाद ढकाल, शारिरीक अपांगता लोकनारायण श्रेष्ठ, बहिरा सम्बन्धि अपांगता भएका सन्जीव श्रेष्ठ र सरिता थापा लगायतले आ आफना कठिनाईका बारेमा जानकारी गराउनुभएको थियो ।
अपांगतालाई राज्यद्धारा उपलब्ध गराएको सेवा सुबिधा दिदै आएको बिभिन्न यातायात ब्यवसायीले जनाएका छन् । कार्यक्रममा जनप्रतिनिधि, यातायात ब्यवसायी, सुरक्षा निकाय, बिभिन्न प्रकारमा अपांगता भएका ब्यक्तिहरुको सहभागिता थियो ।
अपांग समाजका अध्यक्ष राम शर्मा पोखरेलको अध्यक्षतामा सम्पन्न कार्यक्रमको संचालन सचिव नारायणप्रसाद रेग्मीले गर्नुभएको थियो ।
