स्याङ्जा १४ भदौ । पुतलीबजार नगरपालिकाका यही भदौ २१ गते शनिवार शारीरिक अपांगता पहिचान, स्वास्थ्य परीक्षण तथा पुनस्र्थापन घुम्ति शिविर हुने भएको छ ।
जिल्ला स्थित अपांगता क्षेत्रमा क्रियाशिल अपांगता भएका ब्यक्तिहरु सहित सरोकारवालाबीचको छलफल मार्फत सो जानकारी दिइएको हो ।
अपांग बाल अस्पताल तथा पुनस्र्थापन केन्द्र बनेपा, काभ्रेपलाञ्चोकको आयोजना तथा पुतलीबजार नगरपालिकाु सहित सबै पालिकाहरु, स्माइल ट्रेण्ड बि एण्ड वी अस्पताल, ग्वार्को, ललितपुर, अपांगता सशक्तिकरण तथा सामुदायिक विकास केन्द्र नेपाल र स्याङ्जा अपांग समाज स्याङ्जाको सहयोगमा १८ बर्षसम्मका शारीरिक अपांगता भएका बालबालिकाको अपांगता पहिचान सहित स्वास्थ्य परिक्षण हुने भएको बनेपा अस्पतालका सुपरभाइजर एवं गण्डकी प्रदेश पोखराका फोकल पर्सन शालिकराम तिमिल्सिनाले जानकारी दिनुभयो ।
शिविरमा जन्मजात खुट्टाका पैतला भित्र फर्केका, आगोले पोलेर अंगहरु एकआपसमा टासिएको, भाँचिएर बांगो भएका, हड्डी नजोडिएको, खुट्टा लुलो र कमजोर भएको, ढाड बांगो वा कुप्रो भएको, जोर्नीहरु र घुँडाको पाङग्रो खुस्किएको, जोर्नीहरु दुख्ने र सुन्न्निने समस्या भएका ब्यक्तिहरु सहभागी हुन पाउनेछन् ।
यसैगरी, हड्डी पाकेर पिप आइरहने, हड्डीमा टि.बि. रोग लागेको, औलांहरु एक आपसमा टाँसिएको वा बढी भएको, शरीरका बिभिन्न जोर्नीहरु बाङगो र खुस्किएको, अन्य हाडजोर्नी सम्बन्धी समस्या भएका, सहायक सामाग्री तथा कृत्रिम अंगको आवश्यकता भएका र ओठ तथा तालु फाटेकाहरुका लागि पनि स्वास्थ्य शिविर मार्फत सेवा प्रदान गरिने भएको सहयोगी संस्था अपांगता सशक्तिकरण तथा सामुदायिक विकास केन्द्र नेपाल, स्याङ्जाका अध्यक्ष युवराज पराजुलीले जानकारी दिनुभयो ।
शिविर पुतलीबजार नगरपालिकाको कार्यालयमा बिहान ९ बजेदेखि सुरु हुने र शिविरमा डाक्टर, नर्स, फिजियो थेरापिष्ट, सहायता तथा सहयोगी सामाग्री निर्माण सम्बन्धी प्राबिधिक, स्वास्थ्य सम्बन्धी काउन्सिलर लगायतको सहभागीता रहने स्याङजा अपांग समाज स्याङ्जाका अध्यक्ष राम शर्मा पोखरेलको भनाई छ ।
पुतलीबजारमा हुने सो शिविरमा जिल्लाभरका सबै पालिकाबाट लक्षित बर्गका अपांगता भएका ब्यक्तिहरु आएर स्वास्थ परामर्श तथा स्वास्थ्य लाभ लिन समेत आयोजक तथा सहयोगी संस्थाहरुको अनुरोध छ ।