स्याङना २३ फागुन । मार्च ८ का दिन मनाईने ११५ औं अन्तराष्ट्रिय महिला दिवसको पुर्वसन्ध्या शुक्रवार पुतलीबजारमा शुक्रबार अन्तरक्रिया सहित महिलाहरुलाई प्रशिक्षण दिइएको छ ।
सबै महिला तथा बालिकाको लागिः अधिकार, समानता र सशक्तिकरण भन्ने मुल नाराका साथ स्याङ्जामा अन्तराष्ट्रिय महिला दिवस मनाइने भएको छ ।
पुतलीबजार नगरपालिकाको आयोजनामा भएको अन्र्तक्रियाको उद्घाटन गर्दै नगर प्रमुख तुलसीराम रेग्मीले पछिल्ले समय महिला सशक्तिकरण र अधिकारका मुद्धाहरु बलियो बन्दै गएको भए पनि यो अवस्था पर्याप्त नभएको बताउनुभयो । उहाँले नेपालको संविधानले नै महिलाहरुको हक, अधिकार र समानतामा विशेष व्यवस्था गरेको र त्यसको पुर्ण कार्यान्वयन हुन जरुरी रहेको बताउनुभयो ।
महिलाहरु आफै पनि आफ्नो हक, अधिकारका विषयमा तदारुकताका साथ लाग्नुपर्ने बताउदै प्रमुख रेग्मीले २१ औं शताब्दिमा अझै पनि महिलाहरु चुलो चौको र घरायसी काममा मात्रै सिमित रहेको र लैगिंक हिंसाबाट पीडित हुने गरेका घटना सुनिरहने भएकाले यस्तो अवस्थाको न्युनिकरण हुनुपर्ने बताउनुभयो ।
कार्यक्रममा सहायक प्रमुख जिल्ला अधिकारी दिपक पौडेल, प्रमुख प्रशासकिय अधिकृत धर्मराज ढुंगाना, नेपाल महिला संघका सचिव बन्दना लम्साल, अखिल नेपाल महिला संघका अध्यक्ष हिरामोती शाही, पुतलीबजार नगर महिला संजालका अध्यक्ष सीता गोदार लगायतले महिलाका योगदान र परिश्रमको मूल्यांकन गरिनुपर्नेमा जोड दिदै भाषणमा मात्र नभई ब्यवहारमै कार्यान्वयन गर्नुपर्ने बताउनुभयो ।
पुतलीबजार नगरपालिका सभाहलमा सम्पन्न कार्यक्रममा जिल्ला न्यायधिवक्ता कला पौडेलले महिला दिवसको पृष्ठभुमि र अधिवक्ता हरिप्रसाद रेग्मीले महिला समावेशीकरण र कानुनी व्यवस्थाका बारेमा कार्यपत्र प्रस्तुत गर्नुभएको थियो ।
नगर उपप्रमुख देवी अर्यालको अध्यक्षतामा सम्पन्न कार्यक्रममा कार्यपालिका सदस्य यशोधा अर्यालले स्वागत एवम् महिला तथा बालबालिका शाखा प्रमुख ठगीकुमारी खनालले संचालन गर्नुभएको थियो । हरेक वर्षको मार्च ८ मा विश्वभर अन्तराष्ट्रिय महिला दिवस मनाईदै आईएको छ ।
