स्याङ्जा २४ असोज । अन्र्तराष्ट्रिय अण्डा दिवसको अवसर पारेर शुक्रवार स्याङ्जाका ६३ वटा सामुदायिक बिद्यालयमा कुखुराका अण्डा बितरण गरिएको छ ।
खिलुङ कालिका एग्रो फार्म भीरकोट, खुमा अर्याल फाउण्डेशन भीरकोट र नेपाल लेयर्स कुखुरा पालक संघ काठमाण्डौंको संयुक्त आयोजनामा स्याङ्जाका सामुदायिक बिद्यालयमा अध्ययरत बिद्यार्थीहरुलाई लक्षित गर्दै अण्डा बितरण गरिएको खुमा अर्याल फाउण्डेशनका अध्यक्ष लेखनाथ शर्माले जानकारी दिनुभयो ।
पुतलीबजार नगरपालिका १ स्थित त्रिभुवन आदर्श नमूना माध्यमिक बिद्यालयबाट अण्डा बितरण कार्य सुरु गरिएको थियो । यहाँका प्रधानाध्यापक प्रेमप्रसाद पौडेललाई फाउण्डेशनका अध्यक्ष शर्माले बिद्यालय प्रांगणमा पुगेर ४ बण्डल अर्थात ८ सय ४० वटा अण्डा हस्तान्तरण गरेर बितरणको शुभारम्भ गरिएको थियो ।
अण्डा हस्तान्तरण कार्यक्रममा पुतलीबजार शिक्षा शाखा प्रमुख बाबुराम बराल, प्रधानाध्यापक प्रेमप्रसाद पौडेल, समाजसेवी सुरजकुमार अधिकारी र महिला नेतृ बन्दना लम्साल लगायतले अण्डाको उपयोगिता र यसका आवश्यकताका बारेमा जानकारी गराउनु भएको थियो ।
‘स्वस्थ्य जीवनका लागि दैनिक अण्डा सेवन गरौं’ भन्ने नारालाई आत्मसाथ गर्दै स्याङ्जाका पुतलीबजार सहित भीरकोट, वालिङ्, गल्याङ नगरपालिका र अर्जुनचौपारी, आँधीखोला फेदिखोला गाउँपालिकागरि ७ वटा स्थानीय पालिकाका ६३ वटा सामुदायिक बिद्यालयका प्रधानाध्यापक मार्फत बिद्यार्थीलाई अण्डा बितरण गरिएको फाउण्डेशनले जनाएको छ ।
फाउण्डेशनका सदस्यहरुले बिभिन्न समूहगत रुपमा छ्ुट्टाछुट्टै पालिकामा पुगी अण्डा बितरण गरेका हुन् । बिद्यार्थी र जेष्ठ नागरिक समेतलाईगरि झण्डै १६ हजार वटा अण्डा बितरण गरिएको फाउण्डेशनले जनाएको छ ।
बालबालिकाका लागि अण्डा अत्यावश्यक भएको र अण्डामा पौष्टिकतत्व धेरै हुनाले मानवीय स्वास्थ्यकालागि अण्डा खानु पर्ने बुझाउदै अण्डा बितरण गरिएको छ । फाउण्डेशनले ३ लाख मूल्य बराबरको अण्डा खरिदगरि बिद्यार्थीलाई उपलब्ध गराएको जनाएको छ ।
स्याङ्जाको भीरकोट नगरपालिकामा स्थापित खिलुङ् एग्रोफार्म मुलुककै नमूना अण्डा उत्पादक फर्म हो । अत्याधुनिक प्रबिधिका मेशिनद्धारा यहाँ दैनिक एक लाख भन्दा बढी अण्डा उत्पादन हुदैै आएको छ ।