स्याङजा १२ भदौ । उत्तरी स्याङ्जाको फापरथुम स्थित आनन्द आश्रममा नेपाली परम्पराको मौलिक तीजगीत प्रतियोगिता सम्पन्न भएको छ । तीज पर्वको अवसरमा आयोजित उक्त प्रतियोगिताको आँधीखोला गाउँपालिकाका उपाध्यक्ष सीता थापाले उदघाट्न गर्नुभएको हो ।
प्रत्येक महिना गरिने साहित्यिक तथा बैचारिक गोष्ठी अन्र्तगत यसपटक तीजगीत प्रतियोगिताको आयोजना गरिएको आश्रममा संस्थापक एवं पूर्वमन्त्री त्रिलोचन ढकालले जानकारी दिनुभयो ।
प्रतियोगितामा समाज सुधार आमा समूह सतौं प्रथम, रजस्थल मावि द्धितीय, जनजागरण आमा समूह पातीखोला तृतीय भएका थिए भने परोपकार आम समूह निबुवाबोटले सान्त्वना पुरस्कार पाएका छन् ।
बिजयी प्रतियोगीहरुलाई पुरस्कार एवं सम्मानपत्र प्रदान गर्दै आँधीखोलाका उपाध्यक्ष थापाले तीज पर्वको ऐतिहासिक महत्व रहेको हुँदा यो पर्वको मौलिकता गुम्न नदिन सबै पक्ष सजग रहनु पर्ने बताउदै आउने पुस्तालाई पनि तीजको महिमा र महत्वबारे जानकारी गराउनु पर्नेमा जोड दिनुभयो ।
आश्रमका सल्लाहकार टीकाराम ढकालको अध्यक्षतामा भएको कार्यक्रममा संरक्षक त्रिलोचन ढकाल, समाजसेवी इन्द्रमणि ढकाल, यदुराज उपाध्यायले शुभकामना मन्तब्य ब्यक्त गर्नुभयो ।
आनन्द आश्रम ज्ञान केन्द्रका सचिव डोलराज ढकालले संचालन गरेको सो कार्यक्रममा राष्ट्रिय संगीतकर्मी संघ गण्डकीका सदस्य बुद्धिसागर परियार, जिल्ला अध्यक्ष दूतप्रसाद नेपाली र त्रिभुवन विश्वबिद्यालयका उपप्राध्यापक डा. सुस्मिता ढकालको मूल्यांकन समितिले गरेको निर्णयका आधारमा बिजयी प्रतियोगीहरुलाई सम्मानित गरिएको थियो ।
प्रतियोगितामा आँधीखोला र पुतलीबजारका ७ वटा महिला समूहको सहभागिता थियो ।