स्याङ्जा १३ बैशाख । गल्याङ नगरपालिकाले पालिका अन्र्तगतका सबै सामुदायिक विद्यालयमा आइतबार भोली देखि पठनपाठन सुरु गर्न आग्रह गरेको छ ।
नगर कार्यपालिका र नगर शिक्षा समितिका बैठकले बैशाख १४ गते आइतवारदेखि सामुदायिक बिद्यालयका पठनपाठन सुरु गर्ने गराउने निर्णय गरेको हो ।
काठमाण्डौं केन्द्रित शिक्षकका आन्दोलनका कारण सामुदायिक विद्यालयका भर्ना अभियानदेखि पठनपाठन रोकिएका छन्। लामो समयसम्म पठनपाठन रोकिदा बालबालिका सहित अभिभावकमा समेत नकरात्मक प्रभाव पर्ने जनाउदै नगरपालिकाले सूचना मार्फत बिद्यालयका गतिबिधि संचालन गर्न सूचित गराएको हो ।
नगरप्रमुख गुरुप्रसाद भट्टराईद्वारा जारी सूचनामा विद्यार्थी भर्ना, कक्षा सञ्चालन, पाठ्यपुस्तक वितरण, शैक्षिक तथा प्रशासनिक कार्यहरूमा तत्काल संचालन गर्न आग्रह गरिएको छ ।
पालिकाद्धारा जारी सूचनाको पालना नगरेमा त्यसबाट उत्पन्न समस्याप्रति सम्बन्धित पक्ष नै जवाफदेही हुनुपर्ने उल्लेख छ ।
गल्याङ्संगै स्याङ्जाका ११ पालिकामध्ये ३ पालिकाले पठनपाठन सुचारु गर्न सूचना मार्फत आग्रह गरेका छन्। यसअघि विरुवा र हरिनास गाउँपालिकाले पनि यस्तै खालका सूचना जारी गरिसकेका छन् ।
