स्याङ्जा १० मंसिर । अर्जुनचौपारी गाउँपालिकामा भएको आँखा परिक्षण शिविरमा २ हजार भन्दा धेरै बिद्यार्थीले सेवा पाएका छन । गाउँपालिकाले बिद्यार्थीहरुलाई लक्षित गर्दै निशुल्क आँखा परिक्षण शिविरको आयोजना गरेको हो ।
पालिकाभित्र ४ दिनसम्म बिद्यालय विद्यालयमा पुगेर दिइएको आँखा परिक्षण शिविरबाट २ हजार २ सय ५९ जना लाभान्वित भएको गाउँपालिकाका अध्यक्ष प्रकाश तिवारीले जानकारी दिनुभयो ।
वडागत रूपमा सञ्चालित शिविरमा सेवा लिएका मध्ये २ सय १७ जनामा थप उपचार आवश्यक देखिएको र थप उपचारकालागि रिफर गरिएको छ ।
वडा नं. १ मा भएको शिविरमा ७४३ जनाको आँखा परीक्षण गरिँदा १०१ जना विद्यार्थीलाई रिेफर गरिएको थियो । वडा १, २ र ३ का विद्यालयमा परीक्षण हुँदा ५६१ जनाको परीक्षण गर्दा ४७ जनालाई थप उपचारका लागि रिेफर गरिएको थियो ।
वडा नं. ५ मा भएको शिविरमा ४२६ जनाले परीक्षण गर्दा ३४ जनालाई थप उपचारको आवश्यकता देखिएको र वडा ४ र ६ का विद्यालयमा परीक्षणमा ५२९ जनाको परिक्षण गर्दा ३५ जनालाई रिफर गरिएको थियो ।
रिफर भएका बालबालिकाको थपसम्पूर्ण उपचार निःशुल्क उपलब्ध गराइने अध्यक्ष तिवारीले बताउनुभयो । उपचारका लागि हिमालयन आँखा अस्पताल पोखरामा पठाइने भएको छ ।
दृष्टि समस्याका कारण बालबालिकाको बृद्धिविकासमा असर पार्ने भएकाले आँखा उपचार दिइएको अध्यक्ष तिवारीको भनाई छ ।
बालबालिका, अभिभावक र स्वास्थ्यकर्मीको सहकार्यबाट जारी अभियान प्रभावकारी बनेको उल्लेख गर्दै पालिकाले सुरु गरेको ‘स्वस्थ आँखाबाट उज्यालो भविष्य’ अभियानलाई आउदा दिनहरुमा पनि निरन्तरता दिने बताउनुभयो ।
गाउँपालिकामा आँखा परिक्षण गर्ने अवसर पाएपछि बालबालिका सहित अभिभावकमा खुशी देखिएको उपाध्यक्ष सपना गुरुङले बताउनुभयो । आफनै गाउँघरमै आँखाको समस्या पहिचान गर्न पाउनु सुखद रहेको उपाध्यक्ष गुरुङ्को भनाई छ ।
गाउँपालिकाको अभियानले आँखा परिक्षणका लागि पोखरासम्म धाउनु पर्ने वाध्यता हटेको र रुपैंया समेत बचत भएको अभिभावकहरुका भनाई छन् ।