स्याङ्जा २२ बैशाख । नेपाल पाराभेटेरिनरी एन्ड लाइभस्ट्क एसिसियसन (नेभ्ला) स्याङ्जाले हरिनास गाउँपालिका ६ स्थित दग्दीमा पशु स्वास्थ परिक्षण शिविरको आयोजना गरेको छ ।
बौद्ध पूर्णिमा र उभौली पर्वको अवसरमा शुक्रवार सरकारले सार्वजनिक बिदा दिएको छ। तर, नेभ्लाले भने पूर्वघोषित तालिका भएको जनाउदै विदाका दिनमा समेत सामाजिक कार्य गर्दे पशु शिविरको आयोजना गरेको हो ।
शिविरमा ४ सय ७६ वटा पशुको स्वास्थ्य उपचार गरिएको छ । जसबाट २ सय ३२ जना किसान लाभान्वित भएका छन्। शिविरमा पशुका गोबर परिक्षण, दुध परिक्षण, पशुु उपचार सेवा, बन्ध्याकरण, रेबिज बिरुद्धको खोप लगायतका सेवा उपलब्ध गराइएको वडा अध्यक्ष दिलु रानाले जानकारी दिनुभयो ।
पन्ध्र जना पशु स्वास्थ्य प्राबिधिकको टोलीले पशुपालन सहित आवश्यकीय प्राबिधिक सेवा प्रदान गरेका छन ्।
गोबर परिक्षणमा धेरेजसोमा नाम्ले तथा गहते किराको संक्रमण देखिएको र यसको उपचार सहित रोग नियन्त्रणका बारेमा जानकारी गराइएको नेभ्ला अध्यक्ष डिल्लीराम अर्यालले बताउनुभयो ।
गाउँपालिकामा आई पशुशिविर संचालनगरी आवश्यक सेवा सहित परामर्श पाउँदा हरिनास गाउँपालिकाबासीलाई राहत पुगेको गाउँपालिका उपाध्यक्ष इन्द्राकुमारी रानाको भनाई छ । उहाले भन्नुभयो , ‘अन्य वडामा पनि यस्ता शिविर आयोजना गर्न आवश्यक देखियो।’
शिविरमा पशुका लागि आवश्यक आहार, विहार, घाँस, रोपण, स्याहार, सुसारका बारेमा समेत प्रशिक्षित गराइएको नेम्लाका पूर्व अध्यक्ष शुशिल अर्यालले जानकारी दिनुभयो । अर्याल भन्नुहुन्छ, ‘मानिसलाई झैं पशुलाई स्वास्थ्य बनाउन सके मात्र स्वस्थ्य दुध र मासु खान पाईन्छ। सबैको ध्यान यता जान जरुरी छ।’
घरगाउँमै आएर पशुको उपचार र पशु स्याहार सम्बन्धी जानकारी पाउँदा भने निकै खुशी लागेको बताउनुहुन्छ स्थानीय किसान पवित्रा मानन्धर।
