स्याङ्जा ४ असोज । स्याङ्जाका कांग्रेसजनले स्याङ्जामा चुनावी गठबन्धन आवश्यक नरहेको जनाएका छन् । आसन्न प्रतिनिधिसभा र प्रदेशसभा निर्वाचनमा स्याङ्जामा गठबन्धन गर्न आवश्यक नरहेको यहाँका जिल्ला नेताहरुको भनाई हो ।
नेपाली जनताको संघारमै आइपुगेको निर्वाचनमा कांग्रेसले जिल्लामा एक्लै प्रतिस्र्धा गर्न सक्षम रहेको जनाएको छ । गठबन्धन बाहेकका दलहरु गृहकार्यमा जुटीसकेको अवस्थामा नेपाली कांग्रेस स्याङ्जाले भने जिल्लामा गठबन्धन नगर्न नेतृत्वपंक्तिलाई सुझाव दिदै आएको जनाएको छ ।
कांग्रेस प्रवक्ता भरतप्रसाद लम्साल भन्छन्, ‘दश प्रतिशत पनि जनमत नभएको जिल्लामा गठबन्धन नगरियोस्। जिल्लागत मिलाउदा (माओवादी र समाजवादी)का बलियो प्रभाव रहेको अरु जिल्लामा मिलाउदा हुन्छ। तर, यहाँ गठबन्धन बिना नै कांग्रेस बलियो छ।’
प्रतिनिधिसभाका २ र प्रदेशसभाका ४ निर्वाचन क्षेत्र रहेको स्याङ्जा जनमतको हिसावले कांग्रेसको बलियो छ । भर्खर सम्पन्न स्थानीय तह निर्वाचनमा पनि एमालेको भन्दा कांग्रेसको मत बढेको छ । कांग्रेसप्रति जनलहर बढेकोले मंसिर ४ गते हुन गइरहेको निर्वाचनका लागि प्रतिनिधिसभा र प्रदेशसभाका सवै सीटमा कांग्रेस एक्लेले जिल्लामा प्रतिस्पर्धा गर्न दिनुपर्ने नेपाली कांग्रेसका नेता तथा कार्यकर्ताका पनि भनाई छ।
‘नब्बे प्रतिशत कांग्रेसको प्रभाव भएको निर्वाचन क्षेत्र हो यो । यसैगरी, ८०—९० प्रतिशत माओवादी÷समाजवादीको प्रभाव भएको क्षेत्रमा टिकट दिंदा गठबन्धनलाई जित्न सहज हुन्छ’ प्रवक्ता लम्सालले थपे, ‘स्थानीय तहको निर्वाचनको मतपरिणामले गठबन्धन दलका प्रभाव देखाइसकेको छ।’
गठबन्धनको तर्फबाट स्याङ्जा १ को (क) मा माओवादीले दावी गर्दै आएपछि कांग्रेसजनमा असन्तुष्टी देखिएको छ। त्यसमा पनि जिल्लामा माओवादी र समाजवादी जनमत न्यून छ ।
सोमबारसम्ममा समानुपातिकतर्फको बन्दसूची निर्वाचन आयोगमा बुझाईसकिएको छ भने असोज २३ गते प्रत्यक्षतर्फको मनोनयन पत्र दर्ता गर्ने कार्यसूची निर्वाचन आयोगले सार्वजनिक गरिसकेको छ ।
