स्याङ्जा १४ चैत । भोली (बिहीवर) अर्थात चैत १५ गतेदेखि सुरु हुने माध्यमिक शिक्षा परीक्षा (एसईई) मा स्याङ्जाका एक सय ६८ विद्यालयका ४ हजार १३३ परीक्षार्थी सहभागी हुने भएका छन् ।
सामुदायिक माध्यमिक विद्यालयका १ सय ३३ र संस्थागत तर्फका ३५ वटा माध्यमिक विद्यालयका विद्यार्थी परीक्षामा सहभागी हुँदैछन् । परीक्षार्थीमध्ये २ हजार एक छात्रा र २ हजार १३२ जना छात्र रहेको शिक्षा समन्वय इकाई स्याङ्जाका प्रमुख विश्वराज आचार्यले जानकारी दिनुभयो ।
नियमिततर्फ ३ हजार ९१४, प्राविधिकतर्फका १५६, ग्रेड वृद्धिका ६३ जना छन्। सामुदायिकतर्फ १ हजार ६५० छात्रा र एक हजार ६३७ छात्र गरी ३ हजार २८७ परीक्षार्थी छन्। त्यसैगरी संस्थागततर्फका ३५१ जना छात्रा र ४९५ छात्रगरी ८४६ छन्।
प्राविधिकतर्फ बालीविज्ञानमा र कम्प्युटर इन्जिनियरिङ ३–३ विद्यालयबाट १५६ जना र धार्मिक ३ माध्यमिक विद्यालयतर्फका १९ जना पनि परीक्षामा सहभागी हुँदैछन्। जिल्लाभरका ११ वटा स्थानीय पालिकालाई समेटेर २६ परीक्षा केन्द्र तोकिएका छन्।
तीमध्ये वालिङ्मा ७ र पुतलीबजार नगरपालिकामा ५, फेदिखोला, आँधीखोला, बिरुवा र अर्जुनचौपारी गाउँपालिकामा एक–एक परीक्षा केन्द्र तोकिएका छन्। भीरकोट, गल्याङ्, चापाकोट नगरपालिका र कालीगण्डकी र हरिनास गाउँपालिकामा २–२ वटा परीक्षा केन्द्र तोकिएका छन्।
एसईइ परीक्षाका लागि आवश्यक उत्तरपुस्तिका सम्बन्धित विद्यालयमा र प्रश्नपत्र सम्बन्धित सुरक्षा निकायमा पुगिसकेको र परीक्षाका लागि आवश्यक पर्ने सम्पूर्ण तयारी पूरा भइसकेको शिक्षा समन्वय इकाई प्रमुख आचार्यले जानकारी दिनुभयो ।