स्याङ्जा ३१ बैशाख । प्रधानमन्त्री कृषि आधुनिकिकरण परियोजना, परियोजना कार्यान्वयन इकाई अन्र्तगत सुन्तला सुपरजोन संचालन समन्वय समिति स्याङ्जाका संयोजक तथा सदस्यले सपथ तथा पदभार ग्रहण गरेका छन् ।
सपथ कार्यक्रममा बोल्दै नगरप्रमुख तुलसीराम रेग्मीले पुतलीबजार नगरपालिकालाई सुन्तलामय बनाउने अभियानमा जुटेको बताउनुभयो । अन्य पालिकाका तुलनामा पुतलीबजारमा सुन्तलाका उत्पादन अत्याधिक हुने जनाउदै यसतर्फ नगरपालिका, किसान र सम्बन्धित कार्यालयले आवश्यक सहयोग गर्नु पर्ने बताउनुभयो ।
गतबर्ष किसानका सुन्तला धेरै नोक्सान भएको जनाउदै क्षतिपूर्तिका लागि प्रदेश तथा केन्द्रिय सरकारसंग छलफल भैरहेको जानकारी दिनुभयो । निर्वाचन प्रक्रियाबाट नेतृत्वमा आउनु भएका संचालक समितिलाई जिल्लाभरका सबै किसानलाई समेटेर अघि बढ्न सुझाव दिनुभयो ।
कार्यक्रममा सुन्तला सुपरजोन परियोजना कार्यान्वयन इकाई कार्यालयका निमित्त प्रमुख इन्द्रप्रसाद सुवेदी, नवनिर्वाचित संयोजक बोधराज अर्याल, पत्रकार महासंघका अध्यक्ष श्रीकृष्ण सिग्देल लगायतले शुभकामना एवं वधाई ब्यक्त गर्नुभएको थियो ।
सुन्तलाजोन परियोजना संचालन समितिका निवर्तमान अध्यक्ष ताराप्रसाद अर्यालको अध्यक्षतामा सम्पन्न कार्यक्रमको संचालन सहसचिव यामबहादुर केसीले गर्नुभएको थियो ।सोही कार्यक्रममा निर्वमान संयोजक अर्यालले नवनिर्वाचित संयोजक अर्याललाई माइन्यूट हस्तान्तरण गर्नुभएको थियो ।
मतदान प्रक्रियाबाट बोधराज अर्यालको संयोजकत्वमा ९ सदस्यीय समिति निर्वाचित भएको हो । समितिको सदस्यहरुमा तिरमाया गुरुङ, शालिग्राम अर्याल, लक्ष्मीप्रसाद बराल, हिमकला शर्मा, सुरेन्द्रप्रसाद रेग्मी, दिलबहादुर राना, हुमनाथ लामिछाने र खिमा शर्मा निर्वाचित हुनुभएको छ। वैशाख १९ गते उदघाटन भएको अधिवेशनले सहमतिको प्रयास गर्दा सफल नभएपछि प्यानलगत रुपमा निर्वाचन प्रक्रियामा गएको थियो ।