स्याङजा १ भदौ । नेपाल बिद्यार्थी संघ स्याङजाले सबै बिद्यार्थीलाई कोरोना बिरुद्धको खोप निशुल्क उपलब्ध गराई दिन सरकार प्रमुखलाई अनुरोध गरेको छ ।
नेपाल बिद्यार्थी संघ स्याङजाले जिल्ला प्रशासन कार्यालय मार्फत प्रधानमन्त्रीलाई ज्ञापनपत्र प्रेषित गर्दै सो को अनुरोध गरेको हो ।
नेविसंघ जिल्ला अध्यक्ष अजित क्षत्री लगायतको समूहले निमित्त प्रमुख जिल्ला अधिकारी हरिप्रसाद शर्मा मार्फत मंगलबार प्रधानमन्त्री कार्यालयमा पठाउनेगरी सो पत्र बुझाएको हो ।
ज्ञापनपत्रमा मुलुकमा प्रतिगमनलाई संवैधानिक रुपमा परास्त गरी गठन भएको नयाँ सरकारसंग नेपाली जनताको आशा ,विश्वास र भरोसा रहेको जनाउदैे छोटो समयमा नै कोरोना नियन्त्रणको निम्ति खोप खरिद सम्झौतालाई प्राथमिकतामा राखेको विषयप्रति हामी आभार व्यक्त गरिएको छ ।
संघका अध्यक्ष अजित क्षत्रीद्धारा हस्ताक्षरित पत्रमा सरकारको खोप वितरणमा बिद्यार्थी प्राथमिकतामा नपरेकोप्रति ध्यानाकर्षण गराउदै परिचयपत्रका आधारमा सबै बिद्यार्थीलाई विश्व स्वास्थ्य संगठनले स्वीकृत गरेका खोप छिटो भन्दा छिटो उपलब्ध गराउन माग छ ।
पत्रमा कोरोना भाइरसका कारण मुलुककोे शैक्षिक क्षेत्र अस्तव्यस्त बनेको, भौतिक रुपमा कक्षा संचालन हुन नसकी भर्चुअल माध्यमले भएको कक्षा संचालन प्रभावकारी नभएको र परीक्षाहरु समेत समयमा नहुँदा शैक्षिक क्यालेन्डर र सिकाईको स्तर खस्किएको उल्लेख छ ।
यी सबै खालका शैक्षिक समस्याको समाधानका निम्ति सबै विद्यार्थीलाई परिचयपत्रको आधारमा कोरोना विरुद्धको खोप निःशुल्क उपलब्ध हुनुपर्ने नेबिसंघको माग हो ।
ज्ञापनपत्र ग्रहण गर्दे निमित्त प्रजिअ शर्माले अहिलेको अवस्थामा सबै उमेर समूहका बिद्यार्थीलाई खोपको आवश्यकता रहेको जनाउदै आफुलाई प्राप्त ज्ञापनपत्र तत्काल प्रधानमन्त्री कार्यालयमा प्रेषित गर्ने जनाउनुभयो ।
