स्याङ्जा, १६ माघ । स्याङ्जा सदरमुकामको प्रतिष्ठित सहकारी रोयल बचत तथा ऋण सहकारी संस्था लि. ले सहकारीका निर्वतमान अध्यक्ष, बौद्धिक व्यक्तित्व, सहकारीका संस्थापक भरतप्रसाद लम्साललाई बधाई तथा सम्मान गरेको छ ।
विकास बैंक तर्फको नेपालकै उत्कृष्ट बैंक मुक्तिनाथ विकास बैंकको हालै सम्पन्न १७ औं साधारण सभाबाट लम्साल संचालकमा निर्वाचित भएका थिए । संस्थाका निर्वतमान अध्यक्ष बैंकको संचालकमा चयन भएकोमा सहकारीले उनलाई सहकारीकै सभाहलमा बधाई तथा सम्मान गरेको हो ।
सम्मान कार्यक्रममा बोल्दै लम्सालले पछिल्लो समय नेपालको आर्थिक क्षेत्र प्रभावित बन्दा नागरिकको दैनिक महँगो बन्दै गएको बताउनुभयो । उहाले लामो समयदेखि विभिन्न देशमा चलेको युद्ध र कोभिडका कारणले नेपालको आर्थिक क्षेत्र प्रभावित बनेको जिकिर गर्नुभयो ।
बधाई तथा सम्मानका अवसरमा रोयल सहकारीका उपाध्यक्ष विष्णुप्रसाद पोखरेल, सूर्यज्योति लाईफ ईन्स्योरेन्स कम्पनी पुतलीबजार शाखाका प्रमुख सुजन पोखरेल लगाएतका वक्ताहरुले लम्सालको व्यक्तित्व र बौद्धिकताको प्रयोगले बैंकले थप प्रगति गर्नेमा शुभकामना व्यक्त गर्नुभएको थियो ।
सहकारी संस्थाका अध्यक्ष नारायण प्रसाद पौडेलको अध्यक्षतामा भएको कार्यक्रमको संचालन संस्थाका सचिव प्रकाश डोटेलले गर्नु भएको थियो भने धन्यवाद ज्ञापन प्रबन्धक शान्ति ढकालले गर्नुभएको थियो ।
२०५६ मा स्थापित रोयल सहकारी संस्था स्याङ्जाका संस्थापक र जिल्लाका व्यवसायीहरुको सक्रियतामा २०६३ मा मुक्तिनाथ विकास बैंक स्थापना भएको हो । बैंकको प्रमुख लगानी र नेपाल भरका ८ सय भन्दा बढि लगानीकर्ताको लगानीमा २०७४ मा मुक्तिनाथ कृषि कम्पनी संचालनमा आएको छ ।