स्याङजा, २६ साउन । स्याङजा मुस्लिम युवा क्लवद्धारा आयोजित खुला रक्तदान कार्यक्रममा १ सय ६ पिन्ट रगत संकलन भएको छ ।
स्याङ्जा मुस्लिम युवा क्लबको आयोजना तथा नेपाल रेडक्रस सोसाइटी स्याङजा शाखाको प्राबिधिक सहयोगमा स्याङ्जा सदरमुकाम स्थित महेन्द्र चोक मंगलबार आयोजित खुला रक्तदान कार्यक्रम ३० जना महिला सहित ७६ जना पुरुषले रगत दान गरेका हुन ।
कोरोना भाइरस संक्रमणको त्रासका वेला पनि मानवीय सहयोगका लागि भन्दै रगतदान गर्न आउनेको संख्या उल्ल्लेख्य रह्यो । कार्यक्रममा विभिन्न संघ संस्था र ब्यक्तिगत रुपमै आएर रगत दान गरेका हुन ।
प्रमुख जिल्ला अधिकारी दिपकराज नेपाल र मेडिकल सुपरिटेन्डेन्ट डा. रमेश आचार्यले रगतदान गर्नु भनेको जीवन दान भएको बताउनुभयो ।
संकलित रगत पोखरा स्थित रक्तसंचार गृहमा पठाइएको रेडक्रसका मन्त्री दिनेश अर्यालले जानकारी दिनुभयो ।
क्लबका अध्यक्ष सागिर अलिको अध्यक्षतामा सम्पन्न कार्यक्रमको संचालन महासचिव मुबारक मियाले गर्नुभएको थियो।
रक्तदानमा पुतलीबजार १ निवासी महादेव श्रेष्ठले १८ औं पटक र इकवाल मियाले १६ औं पटक रगतदान गरेको जनाउनुभयो ।
