स्याङ्जा १९ बैशाख । प्रधानमन्त्री कृषि आधुनिकीकरण परियोजना, परियोजना कार्यान्वयन इकाई सुन्तला सुपरजोन संचालन समन्वय समिति, स्याङ्जाको चौथो अधिवेशन बुधवारदेखि स्याङ्जा सदरमुकाममा सुरु भएको छ ।
अधिवेशनको उदघाटन गर्दै जिल्ला समन्वय समितिका प्रमुख श्रीप्रसाद घर्तिले माटो सुहाउदो उत्पादन गरेमा रोजगारकै निम्ति बिदेशीनु नपर्ने बताउनुभयो । स्याङ्जाको माटोमा सुन्तला उत्पादन अत्यन्तै राम्रो हुने उहाको भनाई छ । बर्षेनी स्याङ्जाले सुन्तलाबाटै लाखौं रुपैंया आर्जन गर्न सफल भएको जनाउदै राष्ट्रिय फलका रुपमा सुन्तलालाई घोषणा गरिनु पनि स्याङ्जाबासीको गौरबका कुरा भएको बताउनुभयो ।
कार्यक्रममा उपप्रमुख खडगराज सुवेदी, पुतलीबजार नगर प्रमुख तुलसीराम रेग्मी, विरुवा गाउँपालिकाका अध्यक्ष सूर्य कुँवर, सुन्तला सुपरजोन परियोजना कार्यान्वयन इकार्य कार्यालय प्रमुख माधब लम्साल, पत्रकार महासंघका उपाध्यक्ष भवानी अधिकारी, सुपरजोन संचालक समितिका पूर्वअध्यक्ष बोधराज अर्याल लगायतले सुन्तला उत्पादनमा बृद्धि गरि आर्थिक सम्मृद्धि हासिल गर्न सकिनेमा जोड दिएका छन् ।
प्रधानमन्त्री कृषि आधुनिकीकरण परियोजना, परियोजना कार्यान्वयन इकाई सुन्तला सुपरजोन संचालन समन्वय समितिका अध्यक्ष ताराप्रसाद अर्यालको अध्यक्षतामा सम्पन्न कार्यक्रममा उपाध्यक्ष तीरमाया गुरुङले स्वागत एवं सहसचिव यामबहादुर केसीले संचालन गरेका थिए ।
झण्डै ४ सय मतदाता रहेको अधिवेशनले एक अध्यक्ष सहित ९ सदस्यीय संचालक समिति चयन गर्ने भएको छ । पुतलीबजार, भीरकोट, वालिङ नगरपालिका र अर्जुनचौपारीका १७ वडाबाट सुरु भएको सुन्तला सुपरजोन परियोजना हाल स्याङ्जाका सबै पालिकामा कार्यान्वयनमा छ । गत बर्ष मात्र स्याङजामा एक अरब १४ करोडको र अघिल्लो बर्ष एक अरब ३८ करोडको सुन्तला उत्पादन भएको थियो ।
जिल्लामा सुन्तला किसानहरु यामबहादुर सेन, रामप्रसाद भण्डारी, ज्ञानेश्वर चापागाई, नविना गुरुङ, मुक्तिप्रसाद अधिकारी, शालिकराम अर्याल, फणिनारायण अर्याल, कृष्णबहादुर अधिकारी, केशव गुरुङ लगायतलाई सम्मान गरिएको छ ।
यसैगरी, सुन्तलाका बारेमा कलम चलाएको भन्दै गल्याङ् निवासी नेपाल टेलिभिजन स्याङ्जाका संवाददाता हिमाल न्यौपानेलाई पनि सम्मान गरिएको छ ।