स्याङ्जा २ बैशाख । भीरकोटमा एकदिने निःशुल्क स्वास्थ्य शिविर गरिएको छ । भीरकोट नगरपालिकाको आयोजना तथा मनमोहन मेमोरियल मेडिकल एण्ड टिचिङ हस्पिटलको प्राबिधिक सहयोगमा भीरकोट नगर अस्पतालमा शुक्रबार एकदिने निल्शुल्क स्वास्थ्य शिविर गरिएको हो ।
शिविरको शुभारम्भ गर्दै गण्डकी प्रदेशका पूर्व शिक्षा तथा सामाजिक विकास मन्त्री मेखलाल श्रेष्ठले नगरपालिकाले नगरबासीप्रति देखाएको स्वास्थ्यको चासो प्रशंसनीय भएको जनाउदै समय समयमा यस्ता कार्य गर्नुपर्नेमा जोड दिनुभयो । जिल्लाको मध्य भागमा स्थापित अस्पतालको गुणस्तरीयता बृद्धिका लागि संघ र प्रदेश सरकारले लगानी गर्न आवश्यक रहेको बताउदै पूर्वमन्त्री समेत रहेका श्रेष्ठले आफुले पनि यसका लागि आवश्यक सहयोग गर्ने बताउनुभयो । अस्पतालका बिशेषज्ञ सहितको थप चिकित्सक ल्याउने प्रयास भैरहेको जानकारी दिनुभयो ।
कार्यक्रममा नगर प्रमुख गोविन्द कर्माचार्यले स्थानीय स्तरमा उपलव्ध सेवा सुविधाको उपयोग गर्न नगरबासीलाई आग्रह गर्नुभयो । मनमोहन मेमारियन हस्पिटलसँग वार्षिकरुपमा यसैगरी शिविर सञ्चालन गर्ने सम्झौता गरेको नगर प्रमुख कर्माचार्यले जानकारी दिनुभयो ।
यसैगरी डाक्टर मनोहर सिं शैयदले महिलाका लागि पाठेघरको मुखको जाँच, बालरोग, हाडजोर्नी, भिडियो एक्सरे लगायतका सेवा उपलब्ध गराउनु जानकारी दिनुभयो । शिविरबाट सिफारिस गरिएको विरामीलाई काठमाडौमा पनि निः शुल्क उपचार हुने उहाँले जानकारी दिनुभयो । उक्त सेवा जेठको अन्तिम हप्तामा दिइने उहाँले उल्लेख गर्नुभयो ।
शिविरमा सिनियर सर्जन डा. मज श्रेष्ठ, स्त्री तथा प्रसुति रोग विषेशज्ञ डा.मनोर दिन सैयद, जनरल फिजिसियन तथा रेडियोलोजीष्ट डा. इश्वर सिम्खडा,.नाक कान घाँटी रोग विषेशज्ञ डा. नवराज बराल, हाडजोर्नी विषेशज्ञ डा. उजोन शाक्य, फिजिसियन डा. प्रशन्न बोहरा, बालरोग विषेशज्ञ डा. धनुमाया गुरुङ, नर्सिङ विभागका सुनिला श्रेष्ठ, सुजिता गिरी, फर्मासिष्ट रन्जित गिरी र व्यवस्थापक संजिव कंडेल लगायतको समूहले स्वास्थ्य सेवा उपलब्ध गराएका थिए ।
शिविरबाट ७ सय ८५ जना लाभान्वित भएका छन् । शिविरमा १ सय ३५ ले स्त्रीरोग सम्बन्धी उपचार सेवा, २ सय जनाले भिडियो एक्सरे सेवा, १ सय जनाले नाक, कान , घाँटी सम्बन्धि उपचार सेवा,१ सय जनाले हाडजोर्नी सम्बन्धी उपचार सेवा,५० जनाले सर्जरी सेवा, १ सय ५० जनाले सामान्य स्वास्थ्य उपचार सेवा र ५० जनाले बालरोगको उपचार सेवा पाएका छन् ।
स्त्रीरोग सम्बन्धी उपचार सेवा लिएका १ सय २० जनाको पाठेघरको क्यान्सर जाँच गरिएको थियो। शिविरमा ५ जनाको सामान्य अपरेसन गरिएको थियो भने थप ५ जनाको मनमोहन मेमोरियल अस्पतालमा निशुल्क अपरेसन सेवा प्रदान गरिने डा.सैयदले जानकारी दिनुभयो ।