स्याङ्जा ११ चैत । भीरकोट नगरपालिकाको दुर्गम थलो गोर्खे भन्ज्याङ्मा हेलिप्याड निर्माण गरिएको छ। भीरकोट ८ स्थित गोर्खेभन्ज्याङ्मा हेलिप्याड निर्माण भएपछि यहाँका स्थानीयबासी खुशी देखिएका छन्।
आकस्मिक आइपर्ने घटनाबाट छिटो, छरितो उपचारका लागि सम्बन्धित निकायसम्म पु¥याउन सहज बनाउन हेलिप्याड निर्माण गरिएको सोही वडा अध्यक्ष नन्दप्रसाद खनालले जानकारी दिनुभयो । सो सेवावाट सो वडा सहित ५ र ९ वडाबासीलाई समेत लाभान्वित हुनेछन्।
‘कोभिड जस्तै अन्य संक्रमण आइपरेमा, सुत्केरी लगायत अन्य इमर्जेन्सी स्वास्थ्य सेवाको आवश्यकता भएमा, ग्रामिण सडकमा हुने दुर्घटनापछि तत्काल उपचारका लागि अस्पताल पुरयाउनु परेमा’ हेलिकोप्टर सहितको सेवा उपलब्ध गराउन सहज बनाउन सकियोस् भन्ने उदेश्यले नगरको दुर्गम क्षेत्रमा हेलिप्याड बनाइएको नगरप्रमुख गोबिन्दकुमार कर्माचार्यले बताउनुभयो ।
ब्यवस्थित हेलिप्याड निर्माणका लागि आउदो आर्थिक बर्ष बजेट विनियोजन गरेर मैदानदेखि बाटोसम्मको पक्की सडक निर्माण गर्ने बताउनुभयो।
पहाडी मुलका नगरपालिका। जताततै सडक संजालले जोडेको छ। अधिकांश ग्रामिण सडक कच्ची छन्। यात्रु क्षमता भन्दा धेरै यात्रु र थेगीनसक्नु सामान बोकेर गाडीहरु गाउँ गाउँमा पुग्दा कयौं पटक दुर्घटनामा परेका छन्। यस्तो अवस्थामा समयमै सुबिधा सम्पन्न अस्पतालमा पु¥याउन सके उनीहरुको ज्यान जोगाउने सकिने थियो भन्नुहुन्छ वडाअध्यक्ष खनाल।
गतबर्ष ग्रामिण सडकमा चल्ने सवारी साधन दुर्घटना हुदाँ समयमै उपचार पाउन नसक्दा केही ब्यक्तिले अकालमै ज्यान गुमाएका थिए। सोह अवस्थालाई मध्यनजर गर्दे दुर्गम ठाउँलाई शहरसम्म जोड्ने उदेश्यले हेलिप्याड निर्माण गरिएको हो।
चार लाख ५० हजारको लागतमा निर्मित हेलिप्याड ४० मिटर लम्वाईको छ। हेलिप्याड निर्माणका लागी वडा कार्यालयले ६५ हजार खर्च गरेको छ। त्यस बाहेक बिभिन्न निर्माण कम्पनीले मैदान सम्याउने कार्यमा निशुल्क सहयोग गरेका छन्।
हेलिप्याड निर्माणपछि पोखराबाट ल्याइएको हेलिकोप्टरले सफल अवतरण गरेको छ। कैलाश हेलिकोप्टरले पोखरा — गोर्खेभन्ज्याङ्मा अवतरण गरेको हो। हेलिकोप्टरमा पोखरा बिमानस्थलदेखि गोर्खेभन्ज्याङ् ६ मिनेटको दुरी हो।