स्याङ्जा २१ मंसिर । फेदिखोला गाउँपालिकाका कार्यपालिका सदस्यले गाउपालिकाका अध्यक्षको कार्यकक्षमा तालाबन्दी गरेका छन्।
कार्यपालिका सदस्यहरुले नै पालिकाका अध्यक्ष घनश्याम सुवेदीको कार्यकक्षमा जाने ढोकामै बुधवार दिउसो तालाबन्दी गरेका हुन। गाउँपालिकाका वडा नं. १, ३, ४ र ५ का वडाअध्यक्ष सहित जनप्रतिनिधिका समूहले बिभिन्न १२ बुदें माग सहित अध्यक्षको कक्षमा जाने ढोकामा अनिश्चितकालिन तालाबन्दी गरेको जनाएका छन्।
गाउँपालिकका अध्यक्ष सुवेदी र प्रमुख प्रशासकिय अधिकृत बिष्णुप्रसाद पौडेलले स्थानीय सरकार संचालन ऐन २०७४ विपरित काम गरेको भन्दै जनप्रतिनिधिहरु आक्रोशित बन्दै तालाबन्दी गरेको जनाएका छन्।
बिशेष गाउँसभाको माग गर्दा वेवास्ता गरेको, आफुखुशी डोजरको प्रयोग गरेको, अनुगमन समिति गठन नगरी आर्थिक अनियमितता गरेको, शिक्षा समिति गठन नगरी शिक्षक सरुवा गरेको, लेखा समिति गठन नगरि खर्च गर्ने गरेको, वडाका विकासमा चासो नदिइएको, तार, जाली, पाइप आफुखुशी बितरण गरेको र वडाबाट आएका शिफारिसलाइ वेवास्ता गरेको, करारका कर्मचारी कार्यपालिकाको निर्णय बमोजिम नगरी आफुखुशी म्याद थप गर्ने गरेको, पालिका अध्यक्षले सवारी साधन निजी काममा पनि प्रयोग गर्ने गरेको, वडाअध्यक्ष र कार्यपालिका सदस्यबीच समन्वय नगरेको, मासिक बैठक बस्नु पर्नेमा भदौदेखि अहिलेसम्म एउटा बैठक पनि नवोलाइएको जस्ता बुँदाहरु उल्लेखगरी तत्काल यि मागलाई सम्बोधन गर्न माग गरिएको वडा अध्यक्ष अमृत क्षेत्रीले जानकारी दिनुभयो ।
सिद्धार्थ राजमार्ग छेवैमा रहेको गाउँपालिकामा ५ वडाहरु छन्। ती मध्ये १,३,४ र ५ कांग्रेस सहित गठबन्धनका १७ जना र नेकपा एमालेका १२ जना छन्। बहुमत अर्कोपक्षतिर भएको भन्दै गाउपालिकाका अध्यक्ष सुवेदीले कार्यपालिका बैठकलाई समेत वेवास्ता गर्दे आएको कार्यपालिका सदस्यहरुको गुनासो हो ।
