स्याङ्जा ४ चैत । पुतलीबजार नगरपालिका अन्र्तगत रहेको प्रगतीनगर — बहाकोट— नाम्चे— काल्खु कच्ची मोटरबाटो अब पक्की बन्ने भएको छ ।
विश्व बैंकको आर्थिक सहयोग तथा पुतलीबजार नगरपालिकाको प्राबिधिक सहयोगमा हालको कच्ची सडक पक्की एवं फराकिलो बनाईनेगरी प्रक्रिया अघि बढेको पुतलीबजार नगरप्रमुख तुलसीराम रेग्मीले जानकारी दिनुभयो ।
प्रमुख रेग्मीका अनुसार, ‘डिपीआर लगायत योजना छनौट गर्दै लम्बिएको सो योजना अब बढ्ने निश्चित भएको छ। बाटो निर्माणपछि पुतलीबजार र तनहुँको दुलेगौडासंग जोडिने छ। यसबाट पुतलीबजार नगरपालिकाका वडा नं. ३, ८, ९ का स्थानीयबासी प्रत्यक्ष लाभान्वित हुनेछन् भने सयौं ब्यक्तिले सो बाटोको उपयोग गर्न पाउनेछन ।’
प्रगतीनगर शिक्षा चोकदेखि काँफलडाँडा — भन्ज्याङ— बहाकोट— नाम्चे— काल्खुसम्म ७ दशमलब ६ किलोमीटर लम्बाईमा पक्की सडक सहित नाली र टेवा पर्खाल रहने इन्जिनियर विमलरंजन कार्कीले जानकारी दिए। दुई लेनको सडकको चौडा ७ मिटरको हुने उहाले जानकारी दिनुभयो ।
विश्व बैंकको ४३ करोड १८ लाखको लागतमा निर्माण गरिने पक्की सडक अबको १५ महिनाभित्र सक्नुपर्ने हुन्छ। नगरपालिकाले सडक निर्माणका लागि टेण्डर समेत खुलाई ठेक्काको प्रक्रियामा रहेको प्रमुख प्रशासकिय अधिकृत हरिराम नागिलाले बताउनुभयो ।
नेपाल शहरी शासकिय तथा पूर्वाधार कार्यक्रम अन्र्तगत विश्व बैंकको ऋण तथा अनुदान सहयोग तथा पुतलीबजार नगरपालिकाको प्राबिधिक सहयोगमा पक्की सडक बनाईने भएको हो ।
ग्रामिण कच्ची सडक पानी पर्दा हिलाम्यै र घाम लाग्दा धुलाम्यै पीडा सहदै आएका यहाँका स्थानीयबासी सडक पक्की बन्ने खबर पाएपछि खुशी भएका छन ।
पुतलीबजार नगरपालिका, विश्व बैंकका प्रतिनिधि सहित सरोकारवालाको समूहले पनि यसअघि स्थलगत निरिक्षणगरी स्थानीयबासीसंग छलफल गरेको थियो ।