स्याङ्जा २७ असार । स्याङ्जा प्रशासन र आँधीखोला गाउँपालिकाले विपत्तीमापरि ज्यान गुमाएका बिचारीचौताराका तुलसीप्रसाद र फलेवासका झलक पौडेलको परिवारलाई भेट गर्नुका साथै बाढी पहिरो प्रभावित बस्तीको निरीक्षण तथा अनुगमन गरेको छ ।
बिपद ब्यवस्थापन समितिका संयोजक एवं सहायक प्रमुख जिल्ला अधिकारी दिपक पौडेलको नेतृत्वमा गएको टोलीले तुलसीप्रसादका परिवारलाई राहत रकम समेत उपलब्ध गराएको छ । सप्रजिअ पौडेलले गण्डकी प्रदेश सरकारद्धारा उपलब्ध भएको ५० हजार नगद परिवारलाई हस्तान्तरण गर्नुभएको हो ।
राहत रकम हस्तान्तरण गर्दै सहायक प्रजिअ पौडेलले दुखद घटना घटेको स्मरण गर्दैै मानवीय क्षति अपुरणीय हुने बताउदै आश्रित परिवारको राहतका लागि राज्यले उपलब्ध गराएको रकम प्रदान गरिएको बताउनुभयो । उहाले भन्नुभयोे, ‘संघीय सरकारद्धारा उपलब्ध हुने २ लाख रुपैंया पत्नीका बैक खातामा राखिदिने छौं।’ बर्षाको समय अझै रहेको जनाउदै सबैभन्दा पहिला ज्यान जोगाउनका लागि सुरक्षित स्थानमा बस्नका लागि सुझाव दिनुभयो ।
गाउपालिकाका अध्यक्ष विश्व पौडेलले स्थानीय बिपद ब्यबस्थापन समितिको बैठकले क्षतिको बिबरण संकलनगरी प्रभावित ब्यक्तिका लागि तत्काल राहत सहयोग उपलब्ध गराइएको र थप सहयोगका लागि पालिका जुटिरहेको जानकारी गराउनुभयो । उहाँले सुरक्षित स्थानमा बसोवासको ब्यवस्थापन बिजुली, खानेपानी र खाद्य ब्यवस्थापनमा पालिका जुटेको पनि बताउनुभयो ।
भेटघाट एवं अनुगमनका लागि पर्वतका सांसद, गाउँपालिकाका उपाध्यक्ष सीता थापा, प्रहरी नायब उपरीक्षक ईन्द्रबहादुर राना, आधीखोला ३ का अध्यक्ष शेरबहादुर कार्की लगायत अन्य वडाका अध्यक्षहरु, स्थानीयबासी लगायत सहभागीले बाढी पहिराको निरीक्षण एवं अनुगमन गर्नुभएको थियो ।
स्याङ्जाको आँधीखोला गाउँपालिका ३ बिचारीचौताराका तुलसीप्रसाद पौडेल र पर्वतको फलेवास नगरपालिका १ का झलकप्रसाद पौडेललाई शनिवार आएको पहिराले बगाउदा मृत्यु भएको थियो ।
बीचमा खोला, खोलाको वारी स्याङ्जा र पारी पर्वत छ । पर्वतको फलेवासतर्फ पहिरो झरेर गोठमा पुरिन थालेपछि गोठमा बाधिएका भैसी बाख्रा फुकाउन खोज्दा झलक र तुलसीलाई पहिराले हुत्ताएर खोलामा पुरयाएको स्थानीयको भनाई छ ।
चार दाजुभाई मध्ये झलक कान्छा र अविवाहित हुन। तुलसी एउटै छोरा हुन भने उनका पत्नी, स—साना २ छोरी, बुवा, आमा छन् ।
शनिवारको पहिराले आँधीखोलाका २ जनाको ज्यान गएको छ भने २ जना घाईते छन । ती मध्ये घाईते एक महिलाको पोखरा स्थित अस्पतालमा उपचार भैरहेको छ । उहाका अवस्था गम्भीर रहेको स्थानीयबासीको भनाई छ । पहिराका कारण ८ घरपरिवार विस्थापित भएका छन् ।
पर्वततर्फको राहतको ब्यवस्था पर्वत जिल्ला प्रशासनद्धारा हुने जनाइएको छ ।