नेपालकै सबैभन्दा अग्लो दावी गरिएको बुद्ध मूर्ति स्याङ्जाको थाप्लेमा

स्याङ्जा १८ पुस । स्याङ्जाको थाप्लेमा निर्मित वशाल बुद्ध मुर्तिले पर्यटक आगमनलाई ह्वात्तै बढाएको छ । मूर्ति अवलोकन तथा घुमघाम गर्नेको ओइरो लागेको छ ।
नेपालकै सबैभन्दा अग्लो दावी गरिएको ५८ फिटे बुद्ध मूर्ति यहाँको अर्जुनचौपारी र आँधीखोला गाउँपालिकाको संगमस्थल पनि हो । विशेष गरी यो अर्जुनचौपारी वडा नं। ६ को थाप्लो मै पर्छ। समुन्द्री सतहदेखि झण्डै २२ सय मिटरको उचाईको थाप्लेमा विशाल बुद्धको मूर्ति बनेको छ । दरौंका गुरुङ समुदायको सहयोगमा बुद्ध मूर्ति निर्माण भएको हो ।
विसं २०७५ सालदेखि सुरु गरिएको मूर्ति २ वर्षमा रंगरोगन सहित पूरा भएको छ । निकै आकर्षक सो मूर्ति झण्डै १ करोड ५० लाखको लागतमा निर्माण भएको हो ।शहर केन्द्रित बसाइसराइलाई नियन्त्रण गर्न भूमिबहादुर गुरुङ् (विश्व) ले थाप्लेमा विशाल मूर्ति निर्माणको परिकल्पना गर्नुभयो । गाउँले दाजुभाइलाई भेला गराउनुभयो ।
पोखरा, काठमाडौं लगायत विदेशमा पुगेका स्थानीयबासी सबैले मन खुलाएर सहयोग गर्नुभयो ।करोडको संख्यामा रकम जम्मा भयो । त्यसपछि मूर्ति निर्माण सुरु गरियोे, विश्व भन्नुहुन्छ । नेपाली काँग्रेसका नेता समेत रहनुभएको विश्व एक्लैले ५० लाख सहयोग गर्नुभएको छ । मूर्ति निर्माणसँगै यहाँ चहलपहल बढेको छ । बालबालिकादेखि जेष्ठ नागरिकसम्म यहाँ आउने गर्छन् ।
मानिसका चहलपहल बढेसँगै यहाँ रेष्टुरेन्ट र गेष्टहाउस सञ्चालनमा ल्याइएको छ । उहाँले भन्नुभयो, ’सुन्दर शान्त र रमणीय स्थलमा बनेको मूर्तिको स्थापनापछि दैनिक सयौंका संख्यामा मानिस आउने गरेका छन् । दैनिक ५ सय व्यक्ति घुम्न आउँछन् भने २० देखि ३५ जनासम्म दिनहुँ बस्न गर्छन् । हामी उनीहरुलाई स्थानीय खाना र संस्कृतिमा रमाउने वातावरण दिन्छौं। ५० जना क्षमताको गेष्ट हाउस पनि संचालनमा छ।’ ‘
विशाल बुद्ध मूर्ति र यहाँका मनोरम प्रकृतिमा रमाउदै समय बिताउने र क्लिक क्लिक गर्दे फोटो खिच्ने पनि उत्तिकै हुन्छन्’, गेष्ट हाउस संचालक संजीव गुरुङले भन्नुभयो, ‘दिनमा आएर फर्कने हुन् वा, बासै बस्नेका लागि पनि स्थानीय खाना र सांस्कृतिमा रमाउन सक्नेछन् ।’
पर्यटकका चाहना बमोजिम क्याम्प फायर, लोक दोहोरी, बार्वी क्यू लगायतका मनोरञ्जनको सुविधा उपलब्ध भएको र घुम्न मात्र नभए बैठक, सेमिनार र अन्य कार्यक्रम पनि गरिने उहाँले बताउनुभयो ।
उक्त स्थानबाटै माछापुच्छ्रे, धवलागिरि लगायतका थुप्रै हिमशृंखला प्रत्यक्ष हेर्न सकिन्छ।
बिहानको सूर्योदय र सूर्यास्त पनि नजिकैबाट देख्न सकिनेछ। आँधीखोला उपत्यकाका लगायत खर्सुको लेक, डहरेको चुचुरो, अलि पर रहेको शिरुवारी पोखरा लगायत वरपरका केही उपत्यका पनि प्रत्यक्ष देख्न पाइन्छ।