स्याङजा २४ भदौ । स्याङ्जा स्थित स्थानीयतह तथा बिषयगत कार्यालयहरुको आर्थिक बर्ष २०८०÷०८१ मा संचालित विकास निर्माण योजना बिषयक दुई दिने बार्षिक समिक्षा बैठक सोमबारदेखि स्याङ्जा सदरमुकाममा सुरु भएको छ ।
जिल्ला समन्वय समिति स्याङ्जाको आयोजनामा भएको बार्षिक समिक्षा बैठकको संघिय सांसद राजु थापाले उदघाटन गर्दै पालिकाहरुले दिर्घकालिन लक्ष्य सहितको उत्पादनमा जोड दिई आर्थिकोपार्जनमा जुट्न आग्रह गर्नुभयो ।
हिजोका जस्तै काम गरेर अब नहुने बताउदै उदार सोचका साथ अघि बढ्न आग्रह गर्नुभयो । भौतिक पूर्वाधारका विकाससंगै जिल्लालाई आउदा दिनमा कस्ता कार्यक्रम गरेर अघि बढाउने हो, त्यसतर्फ सोचेर दिर्घकालिन योजना सहित अघि बढन सुझाव दिनुभयो ।
जिल्लामा ठूला र गौरबका आयोजना नभएका बेला बैदेशिक सहयोगमा पुतलीबजार नगरपालिकामा संचालित दुई जिल्ला जोड्ने सडक निर्माणका लागि गरिएको अबरोधले उनीहरुका चेतनाको स्तरको मापन गरेको उहाले भन्नुभयो । शिक्षित जिल्लाका रुपमा ख्याती कमाएको स्याङ्जाका केही सामाजिक अगुवाहरु नै विकासमा बाधक बनेको बताउनुभयो ।
‘पालिका पालिकामा विकासका निर्माण भएकै छन् । ठुल्ठूला पालिकाका भवन बनेका छन् । घर घरमा सडक संजाल पुगेका छन् । मानिसका जीवन स्तर सुधे्रेको छ । तर, पनि गाउँघरमा मानिसको बसाई निकै कम हुदै गएको छ । कतै हामीलाई हाम्रै छोराछोरीले पनि विश्वास गर्न छाडेका त हैनन् ? स्वदेश छाडेर बिदेशी मोह जागेको छ । यसतर्फ तीन तहका सरकारले गम्भीर भएर सोच्नु पर्ने बेला आएको छ ।’ सांसद थापाले भन्नुभयो ।
विकास निर्माण, जनसंख्यासंगै एसईईको नतिजा हेर्दा शिक्षाको अवस्था खस्केको बताउदै सांसद थापाले जसका कारण विकास निर्माणमा समेत चुनौती थपिएको जनाउनुभयो ।
विदेशी लगानी सुरक्षित गर्ने कानून नभएका कारण विदेशी लगानी आउन नसकेको उहाले भन्नुभयो । नेपालको बजेटले ठूलाठूला ब्यवसाय संचालन गर्न नसक्ने र विदेशी लगानी पनि सुरक्षित हुने अवस्था नभएकै कारण ठूला ब्यवसायीले लगानी गर्न नसकेको जिल्ला सभापति समेत रहनु भएका थापाको भनाई हो ।
बैठकमा गण्डकी प्रदेश लेखा समिति सभापति सुधिर पौडेल, पुर्वमन्त्री सीता सुन्दास, कास्की जिल्लाका समन्वय समितिका प्रमुख लिलाधर पौडेल, प्रमुख जिल्ला अधिकारी सुनिता नेपाल, स्याङ्जाका उपप्रमुख खड्कराज सुवेदी लगायतले जिसस र स्थानीय पालिकाको भूमिका सहित उत्पादन सहितको आर्थिकोपार्जनमा जोड दिनुपर्ने बताउनुभयो ।
पहिलो दिनको बैठकमा कालीगण्डकी, फेदिखोला, हरिनास, बिरुवा गाउँपालिका सहित भीरकोट नगरपालिका लगायत लगायतका केही कार्यालयले आ—आफ्नो बार्षिक प्रगती उपलब्धी प्रस्तुत गरेका थिए ।
जिल्ला समन्वय समितिका प्रमुख श्रीप्रसाद जिटीको अध्यक्षतामा सम्पन्न कार्यक्रमको संचालन जिल्ला समन्वय अधिकारी उदय पराजुलीले गर्नुभएको थियो । सोमबार प्रस्तुत गर्न वाँकी रहेका स्थानीय पालिकाले मंगलबार प्रस्तुत गरेसंगै समिक्षा बैठक सकिने भएको छ ।