स्याङ्जा १२ माघ । स्याङ्जा सदरमुकाम अर्थात पुतलीबजार नगरपालिका १ स्थित त्रिभुवन आदर्श नमूना माध्यमिक बिद्यालयमा बालबालिकासंग पाहुना अर्थात चिल्ड्रेन वीथ गेस्ट कार्यक्रम गरेको छ ।
बिद्यालयको बार्षिक क्यालेण्डर अनुरुप सो कार्यक्रम गरिएको बिद्यालयका प्रधानाध्यापक मुक्तिप्रसाद रेग्मीले जानकारी दिनुभयो । कार्यक्रममा स्याङ्जाका प्रमुख जिल्ला अधिकारी सुनिता नेपाल र प्रहरी प्रमुख एवं प्रहरी उपरीक्षक संजयबहादुर राउतलाई पाहुनाका रुपमा बोलाइएको थियो ।
प्रजिअ नेपालले बालबालिकाका जिज्ञासाको जवाफ दिदै सबैभन्दा पहिला अध्ययन कार्यमा ध्यान दिन सुझाव दिनुभएको थियो । उहाले संद्धान्तिक तथा ब्यवहारिक शिक्षा दुबै आर्जन गर्नुपर्ने बताउदै अनुशासन र कर्तब्यनिष्ट भै कार्य गरेमा सफलता प्राप्ति हुने बताउनुभयो । बालबालिकाका जिज्ञासामा उहाले आफनो बाल्यकालदेखि हालसम्मका शैक्षिक तथा निजामति सेवा र प्रजिअको भूमिकामा बारेमा जानकारी गराउनु भएको थियो ।
यसैगरी, सोही कार्यक्रममा प्रहरी उपरीक्षक राउतलाई पनि बालबालिकाले जिज्ञासा सोधेका थिए । प्रहरी सेवाको प्रवेश, प्रहरीका सेवा प्रवाह, लागु औषध दुब्र्यसन र यौन हिंसाका बारेमा सोधिएका प्रश्नको उहाले जवाफ दिनु भएको थियो । प्रहरी सेवामा प्रवेश गर्ने चाहना राख्दै जिज्ञासा राख्ने बालबालिकालाई प्रहरी सेवामा प्रवेश र योग्यताका बारेमा जानकारी गराउनुभएको थियो ।
सोही कार्यक्रममा झण्डै ३ दर्जन भन्दा बढी बालबालिकाले प्रअिज सुनिता नेपाल र प्रहरी उपरीक्षक संजयबहादुर राउतसंग आफना जिज्ञासा राखेका थिए । प्रत्यक्ष रुपमा आफना जिज्ञासा राख्न पाएकोमा बालबालिकाले खुशी ब्यक्त गरेका थिए ।
बिद्यालय ब्यवस्थापन समितिका अध्यक्ष देवेन्द्रप्रसाद गुरुङको अध्यक्षतामा सम्पन्न कार्यक्रममा प्रधानाध्यापक मुक्तिप्रसाद रेग्मीले स्वागत एवं सहायक प्रधानाध्यापक प्रेमराज पौडेल र शिक्षक शिव ढकालले संचालन गर्नुभएको थियो । सोही कार्यक्रममा बालबालिकाले नाचेर मनोरंजन दिएका थिए ।