स्याङ्जा, ९ फागुन । पछिल्लो जनगणनामा स्याङ्जाको जनसंख्या घटेको छ। दश बर्षपछि भएको जनगणनाको प्रारम्भिक तथ्यांक अनुसार स्याङ्जाको जनसंख्या झण्डैं ३५ हजारले घटेको छ।
केन्द्रिय तथ्यांक बिभागद्धारा प्रकाशित प्रारम्भिक प्रतिवेदन अनुसार १ दशमलब २१ प्रतिशतले जनसंख्या बृद्धिदर घटेको उल्लेख छ। प्रत्येक दश÷दश बर्षमा गरिने जनगणना विस २०६८ पछि अहिले २०७८ मा भएको हो।
२०७८ अनुसार यहाँको जनसंख्या २ लाख ५४ हजार २ सय ७७ छ। तर, १० बर्षअघिको गणनामा २ लाख ८९ हजार १ सय ४८ जनसंख्या थियो। अघिल्लो पटकको तुलनामा यसपटक ३४ हजार ८ सय ७१ जना कम जनसंख्या देखाएको छ।
प्रारम्भिक नतिजामा अनुसार पुरुषको संख्या १ लाख १७ हजार ४४० जना छन। महिलाको संख्या १ लाख ३६ हजार ८ सय ३७ छन। पुरुष भन्दा महिलाको संख्या १९ सय ३ सय ९७ ले बढी छ।
पाँच नगरपालिका र ६ गाउँपालिका रहेको स्याङ्जामा सबै भन्दा बढी जनसंख्या वालिङ नगरपालिकामा र सबैभन्दा कम फेदिखोला गाँउपालिकामा देखिएको छ।
वालिङ् नगरपालिकामा ५० हजार ९ सय २२, पुतलीबजारमा ४२ हजार ७९, गल्याङमा ३१ हजार १ सय २५, चापाकोटमा २२ हजार ७ सय ८७ र भीरकोटमा २२ हजार ६ सय १७ जनसंख्या उल्लेख छ।
तर, २०६८ मा वालिङमा ५१ हजार ४ सय ३७, पुतलीबजारमा ४५ हजार ५ सय १०, गल्याङमा ३७ हजार ८ सय २१, चापाकोटमा २६ हजार १०१ र भीरकोटमा २५ हजार ५ सय ८४ जनसंख्या थियो।
यसैगरी, कालीगण्डकी गाउँपालिकामा १८ हजार ८, आँधीखोलामा १४ हजार ९ सय ७०, अर्जुनचौपारीमा १४ हजार ९४, विरुवामा १३ हजार ९ सय, हरिनाशमा १२ हजार ९ सय ७९ र फेदीखोलामा १० हजार ७ सय ८६ जनसंख्या छ।
तर, २०६८ को जनगणना अनुसार कालीगण्डकीमा २१ हजार ८ सय २४, विरुवामा १८ हजार ४ सय १३, हरिनाशमा १७ हजार ३ सय ४३, आँधीखोलामा १६ हजार ५सय ९५, अर्जुनचौपारीमा १६ हजार १ सय ७९ र फेदीखोलामा १२ हजार ३ सय ४१ जनसंख्या थिए।
प्रकाशन गरेको राष्ट्रिय जनगणना २०७८ अनुसार नेपालको जनसंख्या २ करोड ९१ लाख ९२ हजार ४ सय ८० रहेको विभागले सार्वजनिक गरेको प्रारम्भिक नतिजामा उल्लेख छ।
शिक्षा, स्वास्थ्य र रोजगारका लागि बसाई सर्नु, युवा शक्ति विदेश पलायन हुनु र कम सन्तान जन्माउनु जनसंख्या बृद्धिदरमा कम ल्याउने तत्व हुन्। जनसंख्यामा आधारमा राज्यका नीति, निर्माण, योजना तथा आवश्यक कार्यक्रम निर्माण गरिने हुदाँ यसका लागि बास्तविक जनसंख्याको महत्वपूर्ण रहन्छ।
