चितिकुनामा राधाकृष्ण मन्दिर सहित सत्संघ केन्द्र

स्याङ्जा ४ मंसिर । पुतलीबजार नगरपालिका ३ स्थित चितिकुनामा नवनिर्मित राधाकृष्ण मन्दिर तथा जेष्ठ नागरिक सत्संघ सेवा केन्द्र बिधिवतरुपमा उदघाटन गरिएको छ ।
बिगत ५ दिनदेखि राधाकृष्ण तथा गणेशका मूर्तिको बिभिन्न धार्मिक बिधि अनुरुप ध्यू, दूध, मह, अन्न, फलफूल र बिबिध औषधीबाट स्नान गराइ प्राणप्रतिष्ठाका बिधि पुरागरि मुक्तिनाथ धामका पीठाधीश १००८ सन्त शिरोमणी लोकानन्द स्वामीवाट शुक्रवारै बिधिवत पुजा अर्चना सहित मूर्ति अनावरण गरिएको हो ।
मन्दिर अनावरण गर्दे स्वामीले धर्मप्रति आस्थावान हुदै सत्कर्म गर्नुपर्ने बताउनुभयो ।
कार्यक्रममा नेपाली कांग्रैसका केन्द्रीय पूर्वउपसभापति एवं पूर्व उपप्रधानमन्त्री गोपालमान श्रेष्ठ, बिष्णु ज्ञवाली भागवत वाचकहरु देवेन्द्र भारद्धाज, गोपाल पाण्डे र आचार्य टिकाराम पौडेल लगायतले सत्संघ केन्द्रलाई धार्मिक पर्यटकीय क्षेत्र निर्माण गरिनु पर्नेमा जोड दिनुभयो ।
यहाँका जग्गादाता छायादत्त दोरंगाा, हुमावती दोरंगा, रामप्रसाद दोरंगाा, भवानी मरासीनी, इश्वरी मरासीनी , पिताम्बर मरासीनी, भगवती मरासीनी र चन्द्रकला मरासीनी लगायतले निशुल्क जग्गा उपलब्ध गराएका हुन। तीन रोपनी क्षेत्रफलमा फैलिएको मन्दिर करिब ३ करोडको लागतमा निर्माण गरिएको हो।
राधाकृष्ण र गणेशका मूर्ति स्थानीयबासी नारायण दोरंगा र राधा दोरंगाले उपलब्ध गराएका हुन। उनीहरुले भारतको राजस्थानबाट ब्यक्तिगत खर्चमा उपलब्ध गराएको सचिव बलराम दोरंगाले जानकारी दिनुभयो ।
मन्दिर निर्माणका लागि संघीय सरकार, गण्डकी प्रदेश, पुतलीबजार नगरपालिका, स्थानीय समाजसेवीको आर्थिक तथा जनश्रमदानबाट गरिएको हो।
पाँच दिने मूर्ति पुजाका अवसरमा करिब १५ लाख रुपंैया संकलन भएको बताइएको छ।