स्याङ्जा २४ चैत । स्याङ्जा बहिरा संघको आयोजना तथा चापाकोट नगरपालिकाको सहयोगमा २ महिने सांकेतिक भाषा तालिम सुरु गरिएको छ ।
तालिमको चापाकोट नगर प्रमुख देवबहादुर खाँण(ईश्वर) ले उदघाटन गर्दै समाजका सबै नागरिकलाई भाषाका माध्यमबाट सिक्ने सिकाउने बुझ्ने बुझाउनका लागि भाषा तालिम सुरु गरिएको बताउनुभयो ।
सबै नागरिकमा एउटै क्षमता नभएको भन्दै फरक क्षमता भएका नागरिकलाई पनि भाषाको माध्यमबाट जान्न र सिक्न पाउने अधिकार सुनिश्चित गर्न यस्ता तालिमको आवश्यकता पर्नेमा उहाले जोड दिनुभयो । स्थानीय सरकार सबै नागरिकको साझा सरकार भएको बताउदै प्रमुख खाँणले फरक क्षमता भएका नागरिकलाई अझ बढी प्रथामिकता दिएर काम गर्ने बताउनुभयो ।
कार्यक्रममा उपप्रमुख ईशा राना, वडा अध्यक्ष कृष्ण सुवेदी, महिला नेतृ दिलु थापा, सिआइएल पोखराका अध्यक्ष हेम गुरुङ, बहिरा संघ स्याङ्जा जिल्ला कार्य समिती सचिव सरिता थापा लगाएतले भाषामा समस्या हुँदा आफ्ना आवश्यक बिषयमा कुरा राख्न निकै कठिन हुने बताउनुभयो ।
आफ्ना समस्या भाषाका माध्यमबाट राख्न यस्ता तालिमले महत्वपुर्ण भुमिका खेल्ने बोल्ने बक्ताहरुको भनाई छ । भुवन भण्डारीले सहजीकरण गरेको सो तालिममा ३० जनाको सहभागी रहने स्याङ्जा बहिरा संघ स्याङ्जाका अध्यक्ष सुनिता थापाले जानकारी दिनुभयो ।