स्याङ्जा ७ फागुन । चापाकोट नगरपालिकामा फागुन ८ गते मंगलबार (भोली) देखि सन्तोष थापा स्मृतिकप खुला भलिवल प्रतियोगिता हुने भएको छ।
दोस्रो चापाकोट महोत्सवका अवसर पारेर पहिलो स्मृति कप प्रतियोगिता गरिने भएको खेल संयोजक राजन दर्लामीले पत्रकार सम्मेलन मार्फत जानकारी गराउनुभयो ।
उहाका अनुसार ‘फागुन ८ देखि सुरु हुने प्रतियोगिता १३ गतेसम्म जारी रहने छ । प्रतियोगितामा राष्ट्रिय तथा गण्डकी र लुम्विनी प्रदेशगरी १२ टीम सहभागि हुनेछन।’
प्रतियोगितामा प्रथम हुनेले समूहले १ लाख ५० हजार, दोश्रो हुनेले १ लाख र तेस्रो हुनेले ५० हजार नगद सहित ट्रफी र मेडल प्राप्त गर्नेछन।
बेष्ट प्लेयरलाई ५ हजार र अन्य बिभिन्न ६ वटा विधाका उत्कृष्ट खेलाडीलाई जनही ३÷३ हजार नगद सहित ट्रफीले पुरस्कृत गरिने भएको छ ।
प्रतियोगी समूहलाई खाने र बस्ने सुविधा रहेको आयोजकले जनाएको छ । प्रतियोगिता सञ्चालनका लागि १७ लाख खर्च हुने चापाकोट नगर खेलकुद विकास समितिका अध्यक्ष मिलन राना पुरनले बताउनुभयो । यसका लागि चापाकोट उद्योग वाणिज्य संघ र चापाकोट नगरपालिका लगायत अन्य संघ संस्था र ब्यक्तिको सहयोग रहने बताइएको छ ।
प्रदेशका अब्बल भलिवल खेलाडी सन्तोष थापाको पुसको अन्तिम साता मोटरसाइकल दुर्घटनामापरि मृत्यु भएको थियो । चापाकोट नगरपालिका २ धुर्कोट जन्मनु भएका थापाको स्मरण गर्दे ४५ दिनको पुण्यतिथी पारेर प्रतियोगिता आयोजना गरिएको पत्रकार गोपिकृष्ण रेग्मीले जानकारी दिनुभयो ।