स्याङ्जा ३ फागुन । श्रीमदभागवत सप्ताह ज्ञान महायज्ञको तेस्रो दिन उल्लेख्य भक्तजनले कथा श्रवण गरेका छन् ।
श्री धुनी शिवालय फूलबारी गुठी गौशाला आश्रम, वालिङ ८ काफलडाँडाको आयोजनामा वालिङ स्थित खेलमैदानमा सोमबारदेखि शुरु भएको श्रीमद भागवत सप्ताह ज्ञान महायज्ञ एवं गौ संरक्षण महामहोत्सव २०७९ को दोस्रो दिन गौ माताको महत्वको बारेमा प्रवचन तथा भजन कृतन गरिएको छ । महायज्ञमा अहिलेसम्म १० लाख १० हजार ८०८ रुपैँया संकलन भएको छ ।
महायज्ञको तेस्रो दिन आज मात्रै ३ लाख २७ हजार ६७२ रुपैँया संकलन भएको रसिद व्यवस्थापन तथा चन्दा संकलन उपसमिति संयोजक शान्ता थापाले जानकारी दिनुभयो । गाई संरक्षणलाई दिगो व्यवस्थापनका लागी आयोजित महायज्ञमा आफ्नो नाममा गाई पालन गर्न चाहाने भक्तजनले २५ हजार ५ सय दिनुपर्ने व्यवस्था गरिएको छ ।
यसरी गाई पालनका लागी २५ हजार ५ सय तथा उक्त रकम भन्दा माथि सहयोग गर्ने सहयोगीहरु ३३ जना पुगेका छन् । सोमबार २१ र मंगलबार ६ र बुधबार पनि ६ जनाले गाई पालनका लागी उक्त रकम प्रदान गरेका हुन् । महायज्ञमा ५ हजार भन्दा माथि सहयोग गर्नेलाई प्रमाणपत्र र १० हजार भन्दा माथि सहयोग गर्नेलाई दोसल्ला र प्रमाणपत्र प्रदान गरिएको छ । महायज्ञमा विभिन्न दानदाताहरुले स्वत स्फुर्त रुपमा व्यक्तिगत रुपमा तथा संस्थागत एवं समुहगत रुपमा समेत आर्थिक तथा जिन्सी सहयोग गर्नुभएको छ ।
गाई संरक्षणका लागी आयोजित महायज्ञ फाल्गुन ७ गतेसम्म सञ्चालन हुनेछ । शिव रात्रिको अवसरमा फाल्गुन ६ गते महाशिवरात्रि विषेश झाँकी एवं शिव कथा वाचन गरिनेछ । बढ्दो बजारीकरण तथा शहरीकरणले गर्दा मानिसले गाई पालनतर्फ रुचि नदेखाउँदा धार्मिक तथा वैज्ञानिक महत्व रहेको गाईको संरक्षणका लागी महायज्ञको आयोजना गरिएको हो ।
वालिङमा रहेका छाडा गाई व्यवस्थापनका लागी स्वार्गाश्रम गौशाला मार्फत गौ संरक्षण गरिएपनि अहिले उक्त स्थानमा प्रयाप्त गौचरनको अभाव हुँदा दिगो गौ संरक्षण गर्न समस्या भएपछि हाल काफलडाँडामा शिवालय फूलबारी गुठी गौशाला आश्रम मार्फत गौ संरक्षण तथा व्यवस्थापन गरिँदै आईएको छ । अहिले उक्त गौशालामा १२६ गाई रहेका छन् ।
महायज्ञमा प्रमुख वाचक पण्डित नेत्रप्रसाद पराजुली रहनुभएको छ । महायज्ञमा पितृहरुको बैकुण्ठवासको कामनाका लागी १० लाख दिप प्रज्वलन, सवा लाख गायत्री मन्त्रजाप तथा हवन, लघुरुद्री पाठ, सतचण्डी पाठ पारायण, नवग्रह शान्ति, कालसर्प योग शान्ति, पितृदोष शान्ति, ब्रतबन्ध, तुलादान, भुमिदान, गौदानलगायतको कार्यक्रमहरु भईरहेका छन् । महायज्ञ सम्पन्न गर्न १५०१ सदस्यीय मुल आयोजक समिति गठन गरिएको थियो ।