स्याङ्जा १२ पुस । रुम टु रिड र सूर्योदय क्लवको संयुक्त आयोजनामा विरुवा गाउपालिका ५ नागस्थत स्थित किचननस आधारभूत बिद्यालयको साक्षरता कार्यक्रमका बारेमा अनुगमन तथा अन्र्तक्रिया गरिएको छ ।
बालबालिकालाई नेपाली भाषा पठन सिपको विकास गर्ने उदेश्यले साक्षरता अभियान संचालन गरिएको हो । साक्षरता कार्यक्रममा कक्षा १ देखि ५ कक्षासम्म बालबालिकाको स्वअध्ययनमा रुची बढाउनुका साथै पुस्तकालयमा गएर पढ्ने बानीको विकास गर्नु रहेको छ ।
अनुगमन, निरीक्षण पश्चात आयोजित अन्र्तक्तिया कार्यक्रममा बोल्दै गाउँपालिकाका अध्यक्ष सूर्यबहादुर कुवरले प्रारम्भिक कक्षाका बालबालिकालाई पठन सिप र पुस्तकालयमा अध्ययन गर्ने वानी विकासका लागि यस्ता शैक्षिक क्रियाकलाप बढी प्रभावकारि रहने बताउदै पालिकाका अन्य विद्यालयले पनि यस्कोे शिको गर्नुपर्नेमा जोड दिनुभयो ।
उहाँले पालिका अन्र्तगत रहेका अन्य बिद्यालयमा समेत यस प्रबिधिको उपयोग गर्दे बालबालिकाका शिक्षण क्रियाकलापमा बृद्धि गर्ने बताउनुभयो । जग बलियो भए मात्र घर बलियो हुने हुदाँ बालबाालिकाको उज्वल भविष्यका लागि सुरुको कक्षादेखि नै शिक्षाको जग राम्रो बनाउनेमा पालिकाले लगानी गर्नेमा जोड दिनुभयो ।
कार्यक्रममा पालिकाका उपाध्यक्ष भगवती शर्मा पोखरेल, शिक्षा शाखा प्रमुख जीवलाल भुषाल, लेखा शाखा प्रमुख शंकर चापागाई, वडा अध्यक्ष मनबहादुर थापा, बिद्यालय ब्यवस्थापन समितिका कल्याणकुमार पोखरेल, शिक्षक अभिभावक संघका अध्यक्ष श्रीकृष्ण शर्मा, प्रधानाध्यापक दुर्गाप्रसाद भण्डारी, पत्रकार महासंघका पूर्व अध्यक्ष प्रकाश डोटेल, शिक्षक सहजकर्ता सुनिता सुनार, परियोजना प्रमुख आशिष न्यौपाने, सूर्योदयक क्लवका मिरा मल्ल, गैसस महासंघका सहसचिव भावना कार्की, लगायतले सानो उमेरदेखि पढ्ने बानीको विकासमा यस्ता क्रियाकलापको आवश्यकतामा जोड दिनुभयो ।
यसैगरी, रुम टु रिड र सूर्योदय क्लवको संयुक्त आयोजना र सम्बन्धित बिद्यालयको साझेदारीमा जिल्लाका ४४ वटा बिद्यालयमा यस्ता परियोजना संचालनमा छन्। परियोजना अन्र्तगत ६१ वटा कक्षाकोठा ब्यवस्थापन, ६४ जना प्रधानाध्यापकलाई तालिम, ८४ जना भाषा शिक्षकलाई तालिम, १ सय २८ जना पुस्तकालय ब्यवस्थापक शिक्षकलाई तालिम दिइएको छ ।
