स्याङ्जा १५ कात्तिक । स्याङजा जिल्ला उद्योग वाणिज्य संघ स्याङ्जाले नजिकिदै गरेको दिपावली, नेपाल सम्वत, छठ र ल्होसार पर्वको शुभकामना आदानप्रदान सहित नवआगन्तुक प्रमुख जिल्ला अधिकारी राजुप्रसाद पौडेललाई स्वागत एवं सम्मान गरेको छ ।
संघको कार्यालयमा आयोजित स्वागत कार्यक्रममा बोल्दै प्रजिअ पौडेलले संघको आत्मिय स्वागतप्रति धन्यवाद दिदै उद्योग ब्यवासायी र कर्मचारीबीच हातेमालो गर्दे अघि बढ्ने बताउनुभयो । पेशागत इमान्दारितालाई अंगाल्दै अघि बढ्न सुझाव दिनुभयो ।
कार्यक्रममा प्रहरी उपरीक्षक होबिन्द्र बोगटी, समरजीत गुल्पति अशोक मल्ल, सशस्त्र प्रहरी नायब उपरिक्षक मोहन न्यौपाने, अनुसन्धान अधिकृत सुरेश तिवारी, सहायक प्रमुख जिल्ला अधिकारी हरिप्रसाद शर्मा, उद्योग वाणिज्य संघका केन्द्रीय सदस्य बिक्रान्तकुमार श्रेष्ठ सुवर्ण र शोभाकान्त पौडेल, भीरकोट नगर उद्योग वाणिज्य संघका अध्यक्ष भक्तबहादुर केसी, बिरुवा इकाई समितिका अध्यक्ष राजेन्द्र केसी लगायतले स्वागत एवं शुभकामना आदानप्रदान सहित ब्यवसायीका हित र उपभोक्ताका अधिकारप्रति सबैले सहयोग गर्नुपर्नेमा जोड दिनुभएको थियो । संघका अध्यक्ष रविन्द्रमान श्रेष्ठको अध्यक्षतामा सम्पन्न कार्यक्रममा वरिष्ठ उपाध्यक्ष हिक्मत श्रेष्ठले स्वागत एवं महासचिव रामचन्द्र नेपालले संचालन गर्नुभएको थियो ।
यसैबीच, कोरोना संक्रमणका बेला बिपन्न परिवारलाई निशुल्क एम्बुलेन्स सेवा संचालनगरी विपन्न र असहाय परिवारप्रति पुरयाएको योगदानको कदर गर्दे स्कुल अफ डेमोक्रेसीका अध्यक्ष अनुप श्रेष्ठलाई सम्मान गरिएको थियो ।