स्याङ्जा २४ चैत । नेपाल प्रशासनिक प्रशिक्षण प्रतिष्ठान (स्टाफ कलेज) का प्रशिक्षार्थी अधिकृतको समूह बिहीवार स्याङजा आएका छन् ।
नवनियुक्त अधिकृतलाई प्रशासनिक क्षमता बृद्धिगरी योग्य राष्ट्रसेवक बनाउने उदेश्यले जिल्लाको अध्ययन अवलोकनका लागि उहाँहरु स्याङ्जा आउनु भएको हो । ३६ औं आवासिय प्रशासन प्रशिक्षण अन्र्तगत रारा समूह यहाँ आएको हो ।
बिहीवार बिहान स्याङ्जा आइपुग्नु भएका उहाँहरुले जिल्ला प्रशासन कार्यालय र पुतलीबजार नगरपालिकामा छुट्टाछुट्टै अन्र्तक्रियात्मक कार्यक्रम सम्पन्न गरेका छन् ।
प्रमुख जिल्ला अधिकारी शशिधर घिमिरेले जिल्लाको प्रशासनिक सेवा प्रवाहका बारेमा जानकारी गराउनुभयो । उहाले सरकारी कार्यालयद्धारा उपलब्ध गराउने सेवा प्रवाह, कठिनाईका बारेमा जानकारी गराउनुभएको थियो ।
यसैगरी, जिल्ला समन्वय अधिकारी ऋषिराम आचार्यले जिल्लाको समग्र चिनारी गराउनुभयो ।
सहायक प्रमुख जिल्ला अधिकारी नमिना रेग्मीले जिल्लाका भौगोलिक, सास्कृतिक, राजनैतिक लगायत बिबिध क्षेत्रका बारेमा जानकारी गराउनुभयो ।
नेपाल सरकारद्धारा नवनियुक्त राजपत्राङ्कित तृतीय श्रेणीमा शिफारिस भएका टोली स्याङ्जा र पाल्पा जिल्लाको अध्ययन अवलोकनका लागि आएको स्टाफ कलेका अध्ययन उपनिर्देशक ज्ञानलक्ष्मी श्रेष्ठले जानकारी दिनुभयो ।
नेपाल सरकारका नवनियुक्त राजपत्राङ्कित तृतीय श्रेणीका २५ जनाको सो समूहमा ५ महिला सहित सबै जातीय तथा समुदायको प्रतिनिधित्व रहेको छ ।
उहाँहरुले नेपाल प्रशासनिक प्रशिक्षण प्रतिष्ठान (स्टाफ कलेज) मा आवासिय आधारभूत प्रशासन सहित ब्यवस्थापन सम्बन्धी प्रशिक्षण लिइरहेका छन् । गएको फागुनको पहिलो सातादेखि सुरु भएको सो तालिम ६ महिनाको रहने कलेजका प्रशिक्षण तथा अनुसन्धान अधिकृत कृष्णबहादुर थापाले बताउनुभयो ।
अधिकृत पदमा शिफारिस भएका नेपाल सरकारका कर्मचारीको क्षमता र दक्षता अभिबृद्धि गर्ने उदेश्यले स्थापित प्रतिष्ठान प्रशिक्षण प्रदायक सस्था हो ।
निजामति सेवामा सबैभन्दा बढी उत्र्तीण हुन सक्षम स्याङ्जा जिल्लाको बस्तुस्थिती, प्रशासनिक सेवा, प्रवाहका बारेमा प्रत्यक्ष एवं अप्रत्यक्ष रुपमा धेरै कुरा जानकारी पाउदा खुशी लागेको प्रशिक्षार्थी अधिकृत राजन सापकोटाले भन्नुभयो ।
सो समूहले बिशेषगरी स्याङ्जाको ऐतिहासिक, धार्मिक, सांस्कृतिक, भौगोलिक, सामाजिक , आर्थिक लगाएर राज्यबाट उपलब्ध गराउने सेवा, सुबिधा र प्रवाहका बारेमा जानकारी लिएका छन् ।